Laura Souto (Pontevedra. 09/07/1993) afronta a súa segunda tempada no equipo feminino da SD Compostela.
A que te dedicas fóra dos terreos de xogo?
Estudo o ciclo superior en animación de actividades físico-deportivas (TAFAD), en Santiago.
En que invistes o teu tempo de ocio?
Pois no meu tempo libre, aparte de xogar ao fútbol, gústame estar cos amigos. Se estou na casa, paso o tempo escoitando música ou navegando en Internet.
Cal é o recuncho favorito de Galicia?
Gústame a gran cantidade de espazos naturais que ten Galicia. Non sabería decantarme por un lugar en concreto pero, recentemente, estiven en Gundián e teño que recoñecer que me encantou.
Que xénero de cine prefires?
Agás as películas de terror, ás demais non lle poño pegas.
Cal é o estilo musical que adoitas escoitar?
Escoito un pouco de todo, pero maioritariamente pop e rock español.
Maior virtude? Defecto?
Agora mesmo non se me ocorre nada!
A onde che gustaría viaxar?
Alemaña é un país que me chama a atención. Hamburgo ou Berlín estaría ben.
Algún soño por cumprir?
Supoño que moitos.
Quen é o teu ídolo futbolístico?
Xavi Hernández (F.C. Barcelona) e Steven Gerrard (Liverpool F.C).
De que equipo es afeccionada?
Gústame o xogo do Barça.
Cando e como comezaches no fútbol?
Comecei cando tiña tan só 7 anos, xogando con nenos nun equipo de A Estrada.
Ata onde che gustaría chegar como futbolista?
Ser unha Vero Boquete non estaría nada mal (risas). Como futbolista, supoño que aspiro ao máximo posible.
Por que te decantaches unha tempada máis pola SD Compostela?
Polo proxecto formulado, creo que é, cando menos, interesante.
Que calidades podes aportar ao conxunto?
Loita e entrega en cada adestramento e partido.
Que cres que diferenza ao Compostela do resto de equipos da categoría?
É moi pronto para poder compararnos con outros equipos, pero dicir ao noso favor que somos un grupo unido, con ganas de mellorar día a día.
Que motivos lle darías a alguén para que vaia a ver un partido de fútbol feminino?
Non é o mesmo fútbol que o masculino pero non por iso é mellor ou peor, simplemente diferente. É por iso que a xente se debería animar a ir a Santa Isabel (campo no que xogamos) ou a calquera campo de fútbol onde xoguen féminas a ver, cando menos, un partido.De seguro que non ha defraudar a ninguén!
