-
Ángela Couso dirixe as clases da Academia da SD Compostela para nenos e nenas de 5 a 16 anos
Santiago de Compostela, 27 de setembro de 2023
Co inicio do curso escolar e o regreso da Canteira Picheleira, volven tamén as clases da Academia da SD Compostela. Con Ángela Couso á fronte da dirección académica, ofrécense clases de reforzo e de inglés para nenos e nenas desde os 5 ata os 16 anos.
Para comezar esta nova etapa na Academia, todos aqueles que se inscriban antes do 13 de outubro, terán un desconto do 50% na cota do primeiro mes.
Para inscribirse e recibir máis información, está dispoñible o correo electrónico academia@sdcompostela.com ou o teléfono 634638312.
Reforzo académico de todas as materias de luns a venres e clases tamén de inglés
A Academia da SD Compostela, situada na Rúa das Cancelas, ofrece reforzo de todas as materias de Primaria e Secundaria. As clases están destinadas para nenos e nenas de 5 a 16 anos, sexan ou non xogadores do club, e divídense en grupos reducidos, de 5 ou 6 alumnos, para favorecer a aprendizaxe e a concentración.
Neste sentido, as clases de apoio da Academia da SD Compostela permiten a todos os alumnos recibir axuda nunha ampla variedade de materias, desde ciencias e matemáticas ata inglés e francés. Así mesmo, faranse grupos específicos de inglés.
Un deses grupos será para alumnado de Bacharelato (ata os 18 anos). Para esta etapa educativa non estarán dispoñibles as clases de reforzo, pero si as de estudo de inglés.
Atendendo á súa función complementaria ás actividades dos pequenos e novos, as clases para os alumnos inscritos repartiranse, de luns a venres, desde as 16.00 ata as 21.00 horas. Nesta liña, téñense en conta os horarios de adestramentos para que poidan compaxinalos coas clases.
Os prezos da Academia varían en función das horas e os días escollidos, así como se se trata de reforzo de materias ou de clases específicas de inglés. Así mesmo, os xogadores da SD Compostela e do CD Conxo Santiago contan cun desconto nas cotas.
Por tanto, baixo a dirección de Ángela Couso, a Academia da SD Compostela garante unha atención personalizada para que os pequenos poidan aprender ao seu ritmo, un ambiente seguro e cómodo para os alumnos, así como o compromiso de apoiar aos nenos e nenas en todo aquilo que precisen.
Como novidade, este ano haberá Talleres de Memoria e Pintura para persoas maiores
Ademais de ofrecer as clases para os menores de idade, a Academia da SD Compostela inclúe este ano alternativas para persoas maiores. Neste sentido, pon en marcha Talleres de Memoria e Pintura, para maiores de 65 anos.
Estas clases desenvolveranse os martes e xoves, desde as 10.00 ata as 11.30 horas, con grupos de 10 persoas por clase. A inscrición neles está dispoñible ata o próximo 18 de outubro.
Igualmente, estes talleres están impartidos por Ángela Couso e o teléfono de contacto é o 634638312.
