-
Os nosos superaron por 4-2 ao Ourense CF no Memorial Antonio Bermúdez, con goles de Edu González, dous, Miguel Prado e Parapar
Santiago de Compostela, 29 de agosto de 2026
A SD Compostela conquistou o X Memorial Antonio Bermúdez. Os nosos superaron por 4-2 ao Ourense CF nun gran partido de fútbol. Unha forma ideal de pechar a pretempada, antes de comezar a liga o vindeiro domingo 6 de setembro, tamén no Vero Boquete, contra o Marino de Luanco.
Na primeira parte, os nosos demostraron a súa superioridade desde o inicio, cun ritmo alto que provocaba chegadas continuas sobre área rival. Así, no primeiro minuto, Manu Rivas sacou un penalti e Edu González transformouno con calma.
O primeiro tanto branquiazul foi rapidamente contrarrestado polo Ourense, nun ataque rápido que culminou o excompostelanista Markitos, aínda que foi unha miraxe na tendencia do primeiro tempo.
E é que o Compos seguiu atacando e acabou atopando o premio, á media hora, nun saque de esquina. Botouno Manu Rivas e rematouno Miguel Prado, de cabeza, ao fondo da rede. E no 42, Edu González selou o seu dobrete remachando na área pequena un gran servizo de Antón Guisande. 3-1 e descanso.
Á volta dos vestiarios, o Compos saltou co mesmo ímpeto, aínda que o Ourense conseguiu xerar máis perigo e así chegaron dous penaltis. O primeiro, marcado por Domi, e o segundo, lanzado por Viti e parado, cunha gran estirada, por Edu Sousa. Foi o terceiro lanzamento fatídico que conseguiu deter nesta tempada estival.
Xa na recta final, con trocos en ambos conxuntos, Parapar pechou o partido cunha obra de arte. Colleuna no pico da área, recortou ao seu rival e púxoa na escuadra contraria para o 4-2 definitivo.
Deste xeito, o Compos fíxose por cuarta ocasión co Memorial Antonio Bermúdez, conseguindo ademais a terceira vitoria da pretempada, un período estival que deixou moi boas impresións para o colectivo de Carlos de Lerma. Agora, comeza o bo. O vindeiro domingo 6 de setembro, ás 12:00 horas, visita o Vero Boquete o Marino de Luanco na primeira xornada de liga.
FICHA TÉCNICA
4 – SD Compostela: Edu Sousa; Jordan (Antón Diéguez, min.48), Miguel Prado, Unai, Damián Noya, Manu Rivas; Ces Cotos (Uxío Abaña, min.82), Dani González; Antón Guisande (Buba, min.82), Edu González (Teofilovic, min.82) e Álex Gil (Parapar, min.67).
2- Ourense CF: Román Noya; Buide, Álex Lorenzo, Viti, Markitos, Domi, Achore, Rami, Robus e Punzano. Tamén xogaron: Gustavo, Penela, Amandi, Ihab, Peter, Simón, Aarón e Algisí.
Goles: 1-0: Edu González (p.), min.3; 1-1: Markitos, min.5; 2-1: Miguel Prado, min.30; 3-1: Edu González, min.42; 3-2: Domi (p.), min.66; 4-2: Parapar, min.85.
Árbitro: Pablo García (Pontevedra).
Incidencias: Estadio Vero Boquete de San Lázaro (Santiago de Compostela). Décima edición do Memorial Antonio Bermúdez. Tiago, bisneto do homenaxeado, fixo o saque de honra.
