- Os socios do Compos que matriculen aos seus fill@s nas escolas infantís de Cativos, nos centros de Conxo e Restollal, terán un 50% de desconto na matrícula
A Sociedade Deportiva Compostela e a rede de escolas infantís Cativos asinaron un convenio de colaboración a través do cal pretenden fomentar a práctica de deporte entre os máis pequenos, promovendo, entre outras cousas, a realización de exercicio físico en familia.
Ambas entidades buscan potenciar o respecto polos demais e polas normas de xogo. Deste xeito, achegarase ós mais pequenos ó exercicio e a unha forma de vida saudable, coñecendo os hábitos que seguen os deportistas de elite, como o son os xogadores da SD Compostela. Outro punto de vital importancia neste convenio será motivar ás familias da comarca de Compostela á realización de prácticas deportivas en familia e ó goce de espectáculos deportivos dos que participen tódolos membros da unidade familiar.
O deporte é un dos piares do proxecto educativo de Cativos que, dende hai anos, desenvolve obradoiros de psicomotricidade, potencia o traballo en grupo e aposta tamén por outro tipo de exercicios para os máis pequenos, mediante actividades como a natación, o ballet, etc.
Cativos amosa así o seu apoio a un dos clubes máis emblemáticos da cidade e anima ós santiagueses e usuarios de Cativos a seguir á SD Compostela nesta nova andadura na Segunda División B, categoría que veñen de alcanzar na tempada anterior.
Pola súa banda, a SD Compostela xestionará unha visita guiada polas súas instalacións para o colectivo Cativos; ademais da posibilidade de que poidan asistir a un adestramento do primeiro equipo e coñecer ós xogadores que integran o plantel.
Os socios compostelanistas beneficiaranse dun 50% de desconto se matriculan aos seus fillos nas escolas infantís de Cativos, nos centros de Conxo e Restollal (condición supeditada á existencia de prazas dispoñible).
A sinatura deste convenio realízase baixo o marco das actividades do XX aniversario de Cativos que se celebra este ano.
