O pasado sábado 10 de xuño celebrouse no Campo Municipal do Milladoiro o partido solidario que enfrontou ao Biduído S.R. coa S.D. Compostela co obxectivo de recadar fondos para a Asociación de Dano Cerebral de Compostela, Sarela.
Na previa do encontro, o Biduído entregou unha placa á S.D. Compostela en sinal de agradecemento pola acción solidaria. Recibiuna, en representación do club, o seu presidente, Antonio Quinteiro
O partido comezou co saque de honra de José Antonio, usuario do proxecto Construíndo Futuro de Sarela, que pasou a integrarse no equipo local para participar no encontro. A S.D. Compostela tamén contou co apoio dunha persoa con dano cerebral adquirido; Ismael, usuario do mesmo programa, que foi o encargado de xogar co equipo visitante.
O marcador rematou en 1-2 a favor do Compos. Ao finalizar o encontro, o presidente de Sarela, José Balboa, entregou un diploma de colaboración da Asociación de Dano Cerebral de Compostela a Miguel Regueiro, presidente do club Biduído.
A recadación da rifa, a entrada do encontro e das vendas da taza e a camiseta solidaria editada polo Biduido, entregaránse á asociación Sarela.
A SD Compostela quere agradecer a invitación e a confianza de Sarela e do Biduido para participar neste partido solidario. Para o club é un pracer poder axudar en actos desta natureza.
