- O novo porteiro branquiazul foi presentado esta mañá no Restaurante San Jaime
Santiago de Compostela, a 4 de Setembro de 2020.
Asinado pola SD Compostela antes mesmo de finalizar a pasada campaña, Borja Rey foi presentado esta mañá no Restaurante San Jaime como novo xogador branquiazul. O porteiro santiagués mostrouse moi ilusionado pola oportunidade de xogar no club da súa cidade e asegurou que achegará moito traballo para competir con Pato Guillén.
“Se che chama o Compos, coa súa infraestrutura e historia, e sendo de Santiago, é imposible dicir que non. É o equipo da miña cidade e tiña moitas ganas de vir”, declarou ante os medios de comunicación.
Ademais, a súa fichaxe veu con premio dobre, posto que a entidade subiu a Segunda División B. “É algo moi ilusionante. É unha oportunidade enorme e vexo ao equipo moi preparado para facer cousas grandes”, sinalou.
Por iso, espero mellorar moito, especialmente, fixándose no seu compañeiro e rival polo posto, Pato Guillén. “Teño un gran compañeiro, do que espero aprender moito para devolver a confianza que puxeron en min”, afirmou.
Neste sentido, traballará como o que máis para conseguir oportunidades. “O rol é o que é e se un está ben creo que vou merecer algunha oportunidade. Traballarei moito para que, se chega o momento, o corpo técnico non dubide se teño que entrar”, explicou.
Pola súa banda, a nivel grupal, ve a todos os compañeiros moi enchufados para chegar a lume de biqueira ao día un. “Sorprendeume para ben a actitude dos compañeiros. Hai moi bo rollo, o cal é moi bo, e fisicamente e en canto a fútbol noto a todos moi ben, incluído a min”, confesou.
Con humildade, tamén asegura que haberá que loitar cada partido para poder manter a categoría. “Chegouse a Segunda B con moito traballo e agora hai que poder gañar un partido para despois pensar noutras cousas”, alentou. Despois, agarda con entusiasmo poder ter a oportunidade de defender o arco na Copa do Rey, se o corpo técnico así o decide. “É algo moi bonito e que nos gusta a todos”, remarcou.
Por último, en canto á modificación dos adestramentos, comentou que haberá que adaptarse polo ben sanitario. “Trastorna o plan do corpo técnico que fai moito traballo preparando cada sesión, pero polo menos o bloque mantense. Os que vimos novos gustaríanos traballar máis xuntos, pero mellor ir lentos e sen risco”, concluíu.
