Santiago de Compostela, a 6 de Xullo de 2016.
A SD Compostela pechou esta mañá a contratación doutras dúas novas incorporacións. Trátanse de Tomás Abilleira, procedente do Pontevedra, e David Rey, que chega do Ordes, dous futbolistas que asinan por un ano co cadro da capital galega.
Tomás Abelleira (02/03/95), fillo do mítico adestrador galego “Milo” Abelleira, é un mediapunta vigués, que ten a capacidade para adaptarse a outras posicións na parcela de ataque.
Xogador de 21 anos, Tomás estivo nas categorías inferiores do Celta e do Pontevedra. Desde ben novo xa apuntaba maneiras, sendo convocado coa Selección Española sub16 cando xogaba no xuvenil B do equipo celeste.
Xa nos granotas, Tomás alternou o equipo filial, co Xuvenil de División de Honra e o primeiro equipo, debutando en terceira división na segunda xornada da tempada 2012/13. Nesa categoría manteríase os dous seguintes cursos, xogando un total 22 partidos co Pontevedra e logrando o ascenso a segunda división B na segunda campaña. Un ascenso que lle permitiría debutar o curso pasado na terceira categoría do fútbol español. Nela disputou oito partidos, cun total de 208 minutos xogados.
Pola súa banda, David Rey (13/08/1984) é un central de 31 anos cunha ampla traxectoria en Segunda División B e terceira. Precisamente, o seu debut na categoría de bronce produciuse coa SD Compostela. Un 12 de outubro de 2003, o rapaz David Rey, de 19 anos, debutaba co primeiro equipo para xogar contra o Alcorcón, un encontro que os santiagueses perderon 2-0, pero que David sempre lembrará. A parte deste partido, xogaría outros sete encontros máis, na que foi a tempada previa á desaparición do equipo.
Foron os inicios dun xogador cuxa carreira profesional estivo posteriormente ligada ao Cerro dos Reyes, Cerceda e finalmente o Ordes, o equipo da súa comarca, e do que chega ao Compos.
Con eles disputou en tres cursos un total de 99 partidos, anotando catro goles. Estandarte da defensa ordense, nas dúas últimas campañas disputou 34 partidos en ambas, todas de titular, axudando a que o equipo se mantivese na categoría.
Con estas dúas novas incorporacións son xa trece os xogadores cos que conta Yago Iglesias para o curso vindeiro.
