- Álex Ube e Diego Rey novas incorporacións da SD
Santiago de Compostela, ao 13 de Xullo de 2016.
A SD Compostela chegou a un acordo na tarde de onte con Álex Ubeira Millán “Ube” e Diego Rey Fernández, para a súa fichaxe por unha campaña co cadro compostelán.
Ube (10/08/1998) chega procedente do Celta Xuvenil de División de Honra, co que aínda lle restaba un ano de contrato, pero do que decidiu despedirse por motivos académicos. O xogador vigués comeza este ano os seus estudos de Dereito na Universidade de Santiago de Compostela, polo que lle era incompatible seguir no cadro celeste, do que leva un grato recordo despois de pasar oito anos e medio alí.
O canteirán celeste, que pode actuar como pivote defensivo ou interior, destaca pola súa calidade para asociarse e o seu bo toque de balón. Un xogador que cumpre o perfil do que se desexa no conxunto vigués. A pesar de que non é un pivote que se caracterice pola súa contundencia e físico, supera esta desvantaxe cunha gran intuición e colocación, o que lle permite roubar moitos balóns. Ademais, cando actúa de interior aproveita a súa chegada e golpeo de balón para crear perigo na zona de tres cuartos.
Ube, que foi internacional sub 16 con España en marzo de 2014, completou o curso pasado o seu segundo ano en xuvenís, pero o primeiro en división de honra. Baixo as ordes de David de Dios, Ube foi un dos xogadores máis utilizados do Celta que acabou a liga cuarto, anotando incluso un gol na primeira volta da competición.
Pola súa banda, Diego Rey (27/07/1992) é un interior esquerdo que chega do Somozas, aínda que xa xogou unha tempada co Compos no 2013.
Aos seus 23 anos, Diego conta coa experiencia de xogar cinco anos en Segunda Divisón B e Terceira, ademais de formarse nas categorías inferiores do Lugo. Unha ampla bagaxe que o traen de volta ao club compostelán.
Nacido en Mieres (Asturias), Diego Rey xogou no Estradense, Somozas (dous cursos, un en Terceira e o pasado en Segunda B), SD Compostela e Atlético Levante.
No seu ano en Compostela, na tempada 2013/14, o interior esquerdo, que tamén pode actuar a banda cambiada, xogou 13 partidos, sendo titular en nove deles e marcando un gol, unhas cifras que o levarían ao filial do Levante, de Terceira División. Un ano máis tarde, Diego Rey regresa a Galicia da man do Somozas, equipo co que disputou outros trece encontros, sendo titular en cinco deles.
Con estas dúas incorporacións, a SD cobre dúas posicións que estaban vacantes, á vez que segue rastrexando o mercado en busca dos xogadores que desexan tanto Yago Iglesias como a comisión deportiva, para completar un plantel que conta xa con dezaseis efectivos.
