- O dianteiro que estaba a proba consegue a última ficha dispoñible.
Santiago de Compostela, a 5 de Agosto de 2016.
A SD Compostela xa conta cos 22 xogadores que conformarán o plantel do equipo para a nova tempada. Este cadro pechouse esta mañá coa confirmación de que David Nogueira, xogador que estaba a proba desde o principio da pretemporada, seguirá baixo as ordes de Yago Iglesias ata o final do curso.
David Nogueira (12/11/1990) é un dianteiro de 25 anos, con pasado na SD Compostela, para a que xogou na campaña 2012-13, aínda que o seu protagonismo foi máis ben escaso, xa que só xogou nove encontros.
O ariete santiagués regresa ao Compos despois dun bo ano co Estudantil, de Preferente Norte. Con eles, David disputou 27 partidos, 22 deles de titular, anotando seis goles. Anteriormente, ademais do Compos, tamén xogou co Pontevedra e o Grixoa, en Terceira División.
Así, desta forma, Yago Iglesias xa conta cos 22 xogadores que desexaba e que loitarán por demostrar en Terceira División o valor dun plantel novo, pero con moitas ganas de lograr grandes cotas.
