Santiago de Compostela, a 8 de Agosto de 2016.
A Sociedade Deportiva Compostela segue con paso firme na Copa Deputación. Tras eliminar ao Lesende, onte foi o Paiosaco quen quedou apeado do torneo copeiro a mans do cadro compostelán.
Do mesmo xeito que o outro día, o Compos dominou o partido de principio a fin, demostrando a súa superioridade técnica ante un rival de inferior categoría. Fíxoo, a partir dun once no que se produciron cinco cambios respecto ao mércores pasado. Manu Cedrón xogou en portería; Saro, David Rey, Taboada e Cabrejo, en defensa; Samu de pivote e por diante unha liña de catro con Diego Rey, Alberto, Mon e Juanin; e en punta de ataque, repetía Santi Gegunde. Cambiou a metade do equipo pero non a filosofía.
Así, a partir de xogadas combinativas, foron aparecendo as primeiras ocasións. As máis claras, unha de Alberto, o canteirán compostelán que fichou esta semana e que estivo moi participativo durante todo o encontro, e un gol anulado a Santi por facer falta á saída dun córner.
Tanto foi o cántaro á fonte, que ao final chegou o gol. Precisamente nunha xogada entre estes dous xogadores. Alberto asistiu a Santi, quen bateu ao meta local cun disparo coa súa perna esquerda. Un gol que lle serviu ao Compos para irse ao descanso con vantaxe no marcador.
Á saída dos vestiarios, a tónica mantívose. Dominaba a SD e creaba as mellores ocasións. Comezou o carrusel de cambios, pero a idea de xogo non variou, menos aínda cando Iriso foi expulsado no 67 por dobre amarela.
Cun xogador máis sobre o campo, os pupilos de Yago Iglesias camparon ás súas anchas polo terreo de xogo, e obra dese dominio chegou o golazo da tarde, obra de Samu, que mandaba o balón á rede cun tremendo disparo desde 25 metros.
Un gol que amornou os ánimos de ambos conxuntos, deixando o resultado final de cero a dous. Trámite resolto e a pensar no seguinte, o mércores, en San Lázaro, contra o Somozas, conxunto co que xa empataron no torneo de Praíña.
Ficha técnica:
0-Paiosaco: Rama; Mante, Sergio, Zalo, Iriso; Javi Fuentes, Josiño, Josiño, Diego Lois, Michi e Porty.
2-SD Compostela: Manu Cedrón; Saro, David Rey, Taboada (C), Cabrejo; Samu, Mon (Make, m.56), Alberto (Tomás, m.74), Diego Rey (Julián, m.61), Juanin e Santi Gegunde (Nogueira, m.68).
