Santiago de Compostela, a 18 de Maio de 2017.
Na Sala de Trofeos do club, a SD Compostela, da man do seu coordinador das categorías inferiores, Juan Vicente Cameán ‘Juanvi’, e acompañado de Javier Puñal, director de marketing, presentou o que será o II Campus de Verán, o cal terá lugar a finais de xuño, do 26 ao 30, nas instalacións do campo Municipal das Cancelas.
Esta segunda edición contará cun patrocinador principal, EMAC, que “cre firmemente na responsabilidade social corporativa e tamén na canteira”, palabras que subscribiu Javier, en nome de Emilio Mato, director xeral da empresa santiaguesa.
Con este novo Campus, o Compos “segue o seu obxectivo de ser referente na cidade e no deporte”. Aínda así, o director de márketing do Compos quixo apuntar que “queremos promocionalo cada vez máis, chegando non só a Santiago, senón tamén aos concellos limítrofes da comarca”.
Na súa primeira edición, a pesar de presentalo tarde por problemas técnicos, o Campus contou cun total de 56 nenos, todo un éxito para os encargados de levalo. “O ano pasado foi unha tolemia, o último día, os pais déronnos moito ánimo e estaban encantados, polo que o noso pensamento é que este segundo ten que ser máis aínda”, reflectiu Juanvi, coordinador das categorías inferiores da escuadra branquiazul.
Juanvi tamén recalcou que “o primeiro obxectivo é que se divirtan, despois que coñezan o fútbol e por último que elixan a SD Compostela e que se animen a participar”. Para iso, dividirán as xornadas cunha mañá na que se traballarán aspectos máis tácticos e técnicos, deixando a tarde para adestrar finalización, realizar xogos e rematar con partidos entre os conxuntos que se formen.
Ademais, xa que poden apuntarse nenos de 5 a 18 anos, “cos máis pequenos traballaremos con aspectos psicomotrices e de iniciación ao xogo, mentres que cos maiores prepararémolos en aspectos máis técnicos”.
O Campus está aberto para nenos e nenas, tanto do club como doutros conxuntos da zona, e pretendemos “que o pasen moi ben e que vexan o que facemos os adestradores e os monitores que temos no club”, explicou Juan.
Os prezos, serán igual que o ano pasado, de 120€ o xeral, 115€ para federados, 105€ para abonados ou fillos de, 60€para os nenos da canteira, 70€ para irmáns inscritos e 80€ media xornada. En adición, poden contratar a comida, na Cafetería Lois, no Centro Comercial das Cancelas, pegado ao campo, por 35€ a maiores.
Buscando estandarizar este campus de verán, o club agarda poder contar cunha cifra maior á do ano pasado e que o pasen igualmente ben. Para apuntarse, deben cubrir o seguinte díptico nas oficinas do club, no Estadio de San Lázaro, o cal estará alí exposto.
