-
O lateral dereito firma por un ano có club
Santiago de Compostela, a 9 de Xuño de 2017.
O Compos xa conta co seu primeiro lateral para o seu novo curso, no que o obxectivo é meterse no playoff de ascenso. Cesáreo Seoane Mella ‘Saro’ continuará no Compos outra tempada máis, xa que asinou co club ata xuño de 2018.
Saro, do mesmo xeito que Samu, chegou ao Compos procedente do Noia, onde era adestrado por Yago Iglesias. Desde que comezou a pretempada, o lateral dereito asentouse no once como un xogador indiscutible. Así, xogaría todos os partidos posibles durante a tempada, tanto de copa como de liga.
Ao terminar o ano, o lateral disputou 37 partidos en Terceira División, con tan só dous de suplente. O partido que se perdeu foi por acumulación de cartóns, xa que lle sacaron cinco. Ademais, en todos estes partidos, anotou un gol, ante o As Pontes, no partido da segunda volta, o cal lle serviu ao equipo para empatar lonxe de San Lázaro, e tamén participou en numerosos tantos, con asistencias ou con incorporacións pola banda que acabaron xerando xogadas de gol.
Coa súa firma, o Compos conta xa con trece xogadores para a nova tempada, á vez que consegue ao seu primeiro lateral para o novo ano, aínda que Uña tamén poderá actuar nesa demarcación se o técnico así o require.
