[cs_video column_size=”1/1″ video_url=” https://youtu.be/oV_fK1Fkbxk” video_width=”500″ video_height=”250″][/cs_video]
-
O equipo quere acabar con boa dinámica para a eliminatoria de campións
Santiago de Compostela, a 11 de Maio de 2018.
A tempada chega ao seu fin e a SD Compostela, cos deberes feitos, gozará dun plácido domingo onde poderá celebrar o título de liga ante toda a súa afección, antes de coñecer ao seu rival do playoff. O equipo quere, tras asegurar o primeiro posto, acabar a liga con boa dinámica para a primeira eliminatoria de campións e porque lograrían un total de 89 puntos, unha puntuación histórica no club e na liga.
Para iso, nesta última cita, os branquiazuis mediranse a un equipo de gran nivel, un CD Choco que xa lles puxo as cousas moi complicadas aos nosos na primeira volta, nun encontro que acabou con triunfo santiagués por 1-2.
“Creo que será un partido moi duro, non porque os tres puntos sexan vitais, senón porque acabarán en San Lázaro e quererán deixar moi boa imaxe, polo que creo que farán un partido igual de aguerrido que en xornadas anteriores”, comentou Yago Iglesias en rolda de prensa.
Para superar este último reto, o corpo técnico ten claro que seguirá apostando polas rotacións. “Seguiremos coa liña continuista das últimas semanas porque dependendo do rival que nos toque, polo tipo de partido que se poida expor, necesitamos ter a todos os xogadores a lume de biqueira”, analizou o técnico.
Nestas rotacións non entrarán nin Santi, que será baixa segura pola súa escordadura, nin Primo, con quen non se arriscará ante a ameaza dunha quinta amarela. Tampouco estará ningún xuvenil, xa que se están xogando a salvación, pero Yago si que espera a Diego Rey, quen xa fixo todo o adestramento no día de hoxe.
Os que formen parte da partida o que teñen claro é que “queremos non só seguir cultivando récords, senón por chegar ao partido de campións con boas sensacións, xa que non é o mesmo facendo as cousas que queremos que tendo outro resultado, aínda que será unha proba para ensaiar certas cousas”, sinalou o adestrador.
Os branquiazuis queren agradar a todos os afeccionados que asistan a San Lázaro, agradecendo o seu apoio durante a tempada cun gran xogo e esperando a que o fortín sexa máis forte que nunca na dura eliminatoria que se verá nos seguintes quince días.
De momento, á espera do rival, toca gozar do título de Liga e ter unha última xornada plácida. Con este motivo, o club permite que todos os socios saquen dúas entradas gratuítas para que todos poidan animar a estes mozos, un plantel que logrou unha tempada incrible.
