-
A Peña Os Dous crea un premio co mesmo nome, que será entregado ao mellor xogador do equipo ao final da tempada
Santiago de Compostela, a 13 de Setembro de 2018.
A afección da SD Compostela quere premiar a uns xogadores que se dan a vida no campo por unhas cores, o azul e branco do Compos. Como homenaxe ao gran traballo realizado a pasada campaña, a Pena Os Dous, involucrando ao resto de agrupacións que forman parte da entidade, creou un premio que se outorgará ao final do ano ao mellor xogador da tempada.
A votación, realizada nun grupo de WhatsApp, no que 19 son os facultados para facelo, segue os pasos do Man of the Match da Premier League. Os participantes sinalan quen foi o mellor xogador dese partido para eles e o máis votado leva un punto para a clasificación xeral, e así sucesivamente nas 38 xornadas que compoñen o campionato ligueiro. En caso de empate, o gañador será o que máis veces fose nomeado entre todos os encontros.
A idea inicial, se a vitoria está decidida, é entregar o trofeo na xornada 37, aproveitando o partido en San Lázaro contra a UD Somozas. Ata o momento, Marcos Remeseiro, Santi Gegunde e Brais Abelenda, cun punto cada un, lideran a clasificación.
Nesta iniciativa privada están involucrados diferentes afeccionados que pertencen ás peñas Fendetestas, Linguazul, Bótalle Outra, Frente Gaias e a citada, Os Dous. Ademais, tamén votan compostelanistas de marcado prestixio como Toncholeto ou outros seguidores que están fóra como Héctor, desde Madrid, Xoserra, en Cantabria, ou Dhanur, en Cataluña. Nestes últimos casos, só teñen a posibilidade de participar se o partido se retransmite pola televisión. A maiores, os creadores convidan tamén a Guille, de Curva Branquiazul, e Fernando Treviño, para que participen a título particular.
A pesar de que o trofeo recibe o nome da peculiar peña impulsora do mesmo, “Os Dous”, aclaran que a idea é que todos sexan partícipes e que o día da entrega estean presentes os representantes de todas as peñas.
Por último, con este premio queren agradecer tamén o labor de Manu Castiñeiras como director deportivo, ao que consideran parte fundamental do devir do club, e a Ramón Castro, directivo encargado das relacións externas e que sempre está preocupado polo afeccionado e que aseguran que cumpre á perfección a súa función.
