-
O lateral santiagués seguirá un curso máis enfundando a elástica branquiazul
Santiago de Compostela, a 14 de Xuño de 2019.
Cesáreo Seoane Mella, máis coñecido como Saro, seguirá un ano máis correndo pola banda dereita do Vero Boquete de San Lázaro. O lateral dereito santiagués renova o seu contrato co Compos por un ano máis, polo que cumprirá a súa cuarta tempada seguida defendendo a elástica branquiazul.
Saro, que chegou ao Compos procedente do Noia, cumprirá así o seu sétimo curso na Terceira División, categoría na que se asentou como un dos mellores carrís. No que respecta a a súa etapa en Santiago, o futbolista superou amplamente os 2.000 minutos de xogo e mesmo os 3.000 no primeiro ano.
Detalladamente, disputou 38 encontros na primeira tempada, trinta e seis deles como titular, 32 na segunda, con vinte e oito partindo de inicio, e 31 a pasada, con vinte e cinco na formación inicial, a última delas no partido de volta do playoff de ascenso contra o Deportivo Alavés B. Neste tempo, ademais, marcou dous goles e repartiu numerosas asistencias.
Coa súa firma, o equipo conta xa con seis peregrinos no camiño a Segunda B. Ao lateral súmanselle tamén Álvaro Naveira, Alberto Freire, Álvaro Casas, Samu Rodríguez e Jorge Queiruga.
