[cs_video column_size=”1/1″ video_url=”https://youtu.be/Pi1dkkyQK6g” video_width=”500″ video_height=”250″][/cs_video]
-
Os nosos queren manter a xeira no Vero Boquete contra o Barco, nun duelo de altura
Santiago de Compostela, a 6 de Ssetembro de 2019.
A SD Compostela repite esta fin de semana no Estadio Verónica Boquete, ante o seu público, en busca de manter a xeira deste comezo ligueiro. Os nosos buscarán plasmar de novo sobre o terreo de xogo a formulación preparada polo corpo técnico no duelo ante o Barco, un rival pola parte alta do campionato e que se reforzou moito este verán.
“É un conxunto que mellora prestacións e plantel cada ano e sempre realizan boas tempadas, a pesar de que adoita comezar titubéante. O curso pasado tampouco gañou ata a xornada 5 ou 6 e despois loitaron para estar arriba ata a penúltima xornada”, destacou Yago Iglesias na rolda de prensa.
A pesar de que continúan co mesmo adestrador, Manolo Pérez, ao cal coñece moi ben o técnico santiagués, o plantel sufriu importantes cambios. “Trouxeron moito xogador de Segunda B e de Terceira do grupo vasco, que suman a outros con moita experiencia como Rubén García, que segue, ou a fichaxe de Moreira, que lle dan moito pouso e experiencia”, apuntou.
Por este motivo, o Barco sempre é un equipo para ter moi en conta, advirte, polo que agarda que chegue o domingo e que se plasme o que esperan. “Estou seguro de que virán a polos tres puntos, que non virán especular nin esperar encerrados. Teñen plantel, calidade e nome máis que suficiente para xogar de ti a ti e así os esperamos”, sinalou.
Para contrarrestalo, e trala final disputada este mércores, os santiagueses preparan, como é habitual, algunha novidade no once, adaptándose ao estilo do rival. “As súas características, xogar en casa e demais farannos utilizar algún xogador distinto e a partir de aí ver se de verdade o que temos na cabeza é o que conseguimos”, reiterou.
Para este duelo, Yago non poderá contar coas tres baixas habituais, malia que agarda empezar a contar con eles xa a semana próxima, ademais de agradecer unha competición como a Copa Federación, para ir repartindo minutos e que collan ritmo de competición.
Os dezaseis que están dispoñibles están listos, e coas pernas preparadas, para unha nova batalla no fortín branquiazul. Chega un rival complicado, pero os nosos, co apoio da bancada, e estreando camisetas, buscarán ampliar a súa dinámica ata o tres de tres. Pese ao rival, queren plasmar a formulación previa para alcanzar a vitoria.
