-
Vitorias do Filial, Xuvenil A, Cadete A e os dous infantís no seu primeiro encontro
Santiago de Compostela, a 10 de Setembro de 2019.
O debut na competición ligueira para os equipos da base da SD Compostela non podería ser case mellor. Dos seis partidos que se disputaron na fin de semana, cinco deles acabaron con vitoria branquiazul e o restante en empate. Entre eles, destacan o triunfo contundente do filial e o do Xuvenil A e Cadete A na súa estrea na liga Galega.
En primeiro lugar, o SD Compostela-Zona Vella estreou a súa nova denominación cun gran triunfo ante o San Mamede por 6-2, resultado que o levanta a un anecdótico liderado. Nunha primeira media hora fulgurante, os pupilos de Fiz Rodríguez colocáronse cun contundente 4-0, con tantos de Bruno Pouso, Isaac Trillo, Pablo Costa e Antón Olveira. A pesar de que os visitantes recortarían diferenzas, de novo Bruno e despois Diego Martínez, selarían o marcador final.
En canto ao Xuvenil A, logo dunha gran posta a punto na pretempada, demostrou esas grandes sensacións cun sólido triunfo por 3-1 ante o Residencia. De novo na liga Galega, os branquiazuis comezaron con gran pé un ano no que agardan loitar polo ascenso, despois de superar aos lucenses con dobrete de Christian Fernández, xogador que adestrou co primeiro equipo no verán, e outro tanto de David Quintás.
Pola súa banda, o Xuvenil B iniciou o campionato cun empate a dous tantos ante o Bastavales. Moisés Bernárdez e Juan Amigo abriron e pecharon o luminoso, respectivamente, para que os nosos sumasen o primeiro punto da tempada.
Tamén na súa estrea na liga Galega, o Cadete A sumou tres importantes puntos ante o Milagrosa. Os branquiazuis estreáronse na categoría cun 2-0, con goles de Manuel Insúa, no primeiro acto, e Sergio Martínez, no segundo.
E por último, o dobrete dos infantís. O Infantil A venceu por 4-3 ao Xuventude Oroso “B”, tres puntos de moito mérito cultivados coas dúas dianas de Anxo Fuentes e os goles de Lois Lortes e Leo González. Mentres tanto, o Infantil B goleou ao La Salle na súa estrea, cun 7-1 final. Sergio Varela, Yago Vilariño, Daniel Varela, Mateo Somoza, Giovanny Alejandro Gallo, Hugo Sabel e Iker Torres dividíronse os tantos da contenda, resultado que os coloca como líderes.
