- O Compos acabou a primeira volta no máis alto tras superar ao Arenteiro por 3-0
Santiago de Compostela, a 14 de Xaneiro de 2020.
Campión de inverno. A SD Compostela pechou unha primeira volta espectacular cunha nova vitoria, a décima consecutiva no Vero Boquete, que lle permitiu acabar no máis alto da clasificación neste primeiro tramo da competición. Para consumar o pleno no fortín, os branquiazuis superaron por 3-0 a un correúdo Arenteiro.
O obxectivo de pechar esta primeira parte da tempada con triunfo canalizouse mercé ao dobrete dun Brais Abelenda que empezou de doce este 2020. Dous tantos seus, un na primeira e outro na segunda, e o gol da sentenza de Gabri Palmás certificaron o que todos desexaban, o 10 de 10.
Coa convicción de seguir coa súa xeira inmaculada no Vero Boquete, o Compos saltou ao campo, no debut ante o seu público neste novo ano, ao douscentos por cen. Cunha marcha moi alta, e mostrando a súa mellor versión, apertou desde o asubío inicial a un Arenteiro que tentaba salvar os mobles como podía.
Froito deste dominio, nada máis arrincar, no 2, Brais Abelenda plantouse só diante de Rui, grazas a un gran servizo de Jimmy, pero na súa indecisión para colocar o disparo, apareceu rápido Toño para cortar o esférico a córner.
Non lle importou ao dianteiro de Bembibre, xa que no 18 subiría o primeiro ao luminoso. Samu rouboulle a carteira ao propio central de Boqueixón, cunha presión adiantada en área rival, o esférico caeu nos pés de Brais que, esta vez, superou por baixo e sen contemplacións ao porteiro.
Coa primeira pedra superada, os branquiazuis seguiron dominando, acumulando xogadas de ataque e accións a balón parado desde a esquina, malia que sen o éxito agardado. A máis clara tívoa Miki, quen nunha das súas innumerables entradas por banda dereita fixo lucirse a Rui. Por contra, no bando visitante, o seu único indicio de perigo chegou nun disparo axustado de Javi Rey, que sacou abaixo Pato Guillén, quen volveu deixar o marco a cero.
Xa na segunda metade, o Arenteiro quixo inquietar cun cambio de sistema, pero a superioridade local maniatouno. A pesar de que Wadir non acertou a rematar un servizo desde a esquerda, o Compos tiña claro o plan de partido e aumentou distancias antes da hora de xogo. Baleato abriu á banda de Miki, o extremo de Nigrán percutiu entre a zaga coa súa velocidade e puxo un servizo ás costas dos centrais para un Brais Abelenda que lle puxo a guinda á acción cunha sensacional vaselina. Era o duodécimo tanto do pichichi branquiazul e un golpe de autoridade do líder no encontro.
Pero aínda chegaría outro máis. No 71, Saro gañou a liña de fondo, puxo un centro tenso atrás que sacou a defensa, pero o balón solto foille a parar a Gabri Palmás quen, tras amagar, aloxouno no fondo das mallas cun disparo cruzado. Era a sentenza.
Ata o final, os nosos baixaron un pouco o ritmo e deixaron correr o tempo para saborear un novo triunfo xunto aos seus. Así, certificouse o dez de dez, trinta puntos doutros tantos posibles no fortín que axudaron, e moito, a alcanzar o campionato de inverno. A bancada festexouno ao grande, aínda que tendo claro que os deberes se rematan en xuño. De momento, poderán saborealo pronto, xa que este próximo domingo o equipo abre a segunda volta no Vero Boquete contra o Alondras.
FICHA TÉCNICA:
3- SD Compostela:
Pato; Saro, Soto, Álvaro Casas, Jimmy; Samu, Baleato (Mon, m.84);
Miki (Gabri Palmás, m.63), Pablo Antas, Hugo Sanmartín (Sergio
Pereira, m.74); e Brais Abelenda.
0- CD Arenteiro: Rui; Pol, David, Toño, Ross (Mitogo, m.57), Ocampo (Iago, m.46); Manu, Pablo, Javi Rey; Jony e Wadir (Albertito, m.63).
Goles: 1-0: Brais Abelenda, min.18; 2-0: Brais Abelenda; min.53; 3-0: Gabri Palmás, min.71.
Árbitro: Álvarez Calderón (Vigo). Amoestou aos visitantes Manu e Mitogo.
Indicencias: Estadio Verónica Boquete de San Lázaro. Partido da décimo novena xornada de liga do grupo 1 da Terceira División disputado ante 900 espectadores. Antes do inicio, realizouse unha homenaxe os abonados do club desde 1962. En representación, Alejandro Vázquez, executou o saque de honra.
