- Un dobrete de Morais decidiu o partido contra o Lugo B disputado no Anxo Carro
Santiago de Compostela, a 1 de Marzo de 2020.
A SD Compostela non puido entrar no mes de marzo con bo pé, xa que caeu por 2-0 contra a Polvorín CD Lugo B. Un dobrete de Morais, cun gol en cada parte, decidiu a contenda disputada no Anxo Carro, significando a terceira derrota na liga do Compos, a primeira despois de dezasete xornadas e catro meses e medio.
Nun campo de fútbol profesional, de dimensións similares ao Vero Boquete, o Compos saíu fiel ao seu estilo tan característico, un xogo de toque que tan ben se adapta a terreos de xogo grandes e de herba natural. Así, e saíndo cunha marcha máis que o seu rival, os branquiazuis comezaron a asediar a área do filial lucense.
Non transcorreran nin dous minutos cando chegou a primeira opción compostelanista cun disparo de Bicho desde a frontal da área, mentres que, seis máis tarde, Saro non conseguiu conectar un pase atrás de Miki.
O mediapunta branquiazul, moi activo no seu regreso tras sanción, probaría tamén os reflexos de Julen nunha falta desde o pico da área na que pisou a pelota Samu e golpeou potente abaixo o sadense, pero o porteiro despexouna a córner, un saque de esquina no que Brais Abelenda non puido acertar coa rede no segundo pau.
Con todo, cando máis asentado estaban os nosos chegou o tanto dos lucenses nunha contra. Manu conectou con Álex Rey e este puxo un servizo á perfección ás costas dos centrais para a carreira dun Morais que se enfrontou no man a man e cravou o disparo axustado ao pau.
O tanto, nun momento psicolóxico, mandou o encontro ao intermedio con vantaxe local, a cal aumentou á volta dos vestiarios. O Compos saíu deles con ganas de igualar, pero atopouse co dobrete de Morais. O filial roubou en zona de tres cuartos e o dianteiro centro non marrou ante Pato. Foron dúas chegadas con dous tantos, o cal complicou as aspiracións santiaguesas.
Aínda así, os de Yago Iglesias non baixaron os brazos e coa entrada de pernas de refresco buscaron continuamente a portería rival. Tívoa Brais Abelenda para recortar diferenzas, pasada a hora de encontro, pero el pase atrás de Primo topouse coas pernas dun defensa cando o de Bembibre xa se dispoñía a embocar.
Con chegadas por banda seguiron insistindo os nosos. Así, sete máis tarde, Josiño puxo o centro raso desde a banda, o cal rematou Hugo Sanmartín, pero o balón foise centrado e atrapou Julen. O propio Sanmartín, nunha gran xogada individual, mandou o golpeo axustado á parte superior da rede. Mesma sorte que atoparon Samu ou Bicho nos últimos compases, polo que non houbo forma de cambiar o luminoso.
Ante a falta de fortuna, o duelo terminou con vitoria local por 2-0 que, consecuentemente, supuxo a derrota da SD Compostela dezasete xornadas despois. Tiveron que pasar catro meses e medio para que caesen de novo os nosos, un tropezo que dará forzas ao cadro branquiazul para volver máis fortes. Para iso, tocará demostrar a fortaleza do fortín o vindeiro domingo, ás 17.00 horas, contra a UD Ourense.
FICHA TÉCNICA:
2- Polvorín FC Lugo B: Julen; Varo, Nico, Quindimil, Matías; Juan Brunet, Manu; Rayco, Álex Rey (Luís, m.80), Chiqui (Christian, m.86); e Morais (Morais, m.68).
0- SD Compostela: Pato; Saro, Álvaro Casas, Queiruga (Gabri Palmás, m.75), Jimmy (Josiño, m.68); Samu, Baleato (Hugo Sanmartín, m.58); Miki, Bicho, Brais Abelenda; e Primo.
Goles: 1-0: Morais, min.41; 2-0: Morais, min.57.
Árbitro: Quintairos Rial (Vigo). Amoestou a Juan Brunet, polos locais; e a Brais Abelenda e Gabri Palmás, polo Compos.
Incidencias: Estadio Anxo Carro (Lugo). Partido da vixésimo sexta xornada de liga do grupo 1 da Terceira División disputado ante 400 espectadores.
