- Yago Iglesias ve ao equipo preparado para loitar contra o Deportivo este domingo
Santiago de Compostela, a 23 de Outubro de 2020.
A estrea no Vero Boquete de San Lázaro para a SD Compostela virá marcado pola disputa do gran derbi, un encontro doutra época que, pola situación sanitaria actual, terase que vivir a porta pechada. Con todo, e co apoio que están a recibir dos seus a través das redes sociais, Yago Iglesias agarda que o Compos saque a súa mellor versión e poida estrear o marcador de puntos no debut no fortín.
Baixas. Temos dúas baixas confirmadas, as de Samu e Bicho. Bicho viaxou a Salamanca, pero xa sabiamos que non podiamos contar con el, iamos ver como se atopaba na semana, probou para ver as súas sensacións, pero non vai chegar. E Samu acabou cunha escordadura o partido pasado, non parecía gran cousa, pero foi máis do agardado, estando toda a semana fora do grupo. O resto chega ao 100%.
O rival. É un equipo que ten moitas variantes e que pode xogar de distintas maneiras. Ademais da profundidade do plantel, Fernando Vázquez é un referente para todos os que nos dedicamos a isto, con moita bagaxe, equipo moi traballado, que manexa moitos debuxos e moitas situacións dentro dun mesmo partido. Esperámonos un Dépor como o que é, un referente da categoría, cun nivel altísimo e moi difícil de meterlle man, pero tentarémolo coas nosas armas.
Fernando Vázquez. É un referente. Falar de calquera equipo galego de nivel é facelo de Fernando Vázquez e mesmo de importantes equipos a nivel nacional. Ademais, no meu caso, é un exemplo porque chegou á elite sen ser antes xogador.
Xogar contra o Deportivo na xornada 2. Un nunca sabe cando é mellor xogar contra este tipo de rivais. Vense falando deste partido mesmo antes de comezar a liga e sempre dixen que o meu pensamento era unha dualidade. A nivel deportivo, si que pode ser que recibilos na xornada 2 sexa mellor, porque como ben dixo o seu adestrador, aínda están en proceso de axuste. Pero polo outra banda, desde fai cinco anos que estamos aquí, todos os que conformamos o club pensamos na globalidade e dentro dela, o máis beneficioso, na situación na que estamos, era telo máis adiante, pensando no beneficio do propio club e dos afeccionados. A mellor noticia sería volver ao Vero Boquete coa afección.
Impresións previas. Vendo o partido da semana pasada, fixemos 31 minutos moi bos. Sen chegar a ser o Compostela da súa mellor versión, a nosa idea creo que se implantou no campo do Reina Sofía, pero co gol o equipo deuse conta da realidade desta categoría. Imos ter que apertar o acelerador porque nos vai a esixir moito máis.
Idea de xogo. A nosa filosofía e idea son claras e todo o mundo sente esta idea. Queremos que o equipo teña maiores rexistros, maior capacidade para enfrontarse aos distintos escenarios que se dan ao longo da tempada, e teremos que chegar a un punto intermedio entre o que nós queremos e o que nos deixe facer o rival.
A semana previa. Foi unha semana moi na liña do ano pasado. Centrámonos en traballar todos os aspectos que cremos que son necesarios para ir mellorando e chegar á nosa mellor versión. E desexando que chegue o domingo, para unha vez máis, ver ao meu equipo no campo, e co paso das xornadas, porque sabemos que nos levará tempo, ver o verdadeiro nivel deste Compostela.
Empezar a sumar. Imos pelexar coas nosas armas e imos tentar explotalas. A partir de aí, nun partido poden pasar moitas cousas. A priori, o Deportivo é o claro favorito, non o imos a negar, pero a nosa idea é facer un bo partido e empezar a sumar, e que mellor que facelo na casa.
Motivación. Estamos na mesma categoría que eles. Creo que para calquera é un premio xogar este tipo de encontros. Creo que son o tipo de partidos no que os xogadores teñen que xogar sen ningún tipo de presión, e gozar.
