Segundo Rey leva vinte anos apoiando á SD Compostela e esta tempada faino patrocinando ao extremo Miki Villar e o próximo derbi galego contra o Pontevedra no Estadio Verónica Boquete de San Lázaro. Co seu apoio continuado ao fútbol base como maior fonte de orgullo, están desexando poder celebrar as vitorias do equipo no fortín branquiazul.
Cal é a súa actividade?
A nosa empresa dedícase á venda de cociñas e baños, así como de materiais para decoración en pavimentos para calquera lugar da vivenda. A nosa actividade comezou no ano 1989 e continuamos desde entón atendendo aos nosos clientes, amigos e colaboradores nas nosas instalacións en Milladoiro.
Dende cando patrocinan ao equipo?
Levamos colaborando coa SD desde 1990, ano do ascenso a segunda división do mítico equipo que dirixía Fernando Castro Santos. Desde entón colaborouse co club na medida do posible, a pesar das dificultades nos anos da crise. Como empresa que naceu en Compostela, entendemos que é fundamental apoiar aos equipos da cidade, non só aos de primeira liña, senón tamén a aqueles deportes minoritarios que dan valor á cidade.
Que lles levou a facelo?
Sempre é unha alegría ver como traballando duro e con seriedade conséguense os obxectivos, aínda que sexan tan complicados como subir á Segunda División B. E este ascenso, como empresa, dános moita máis visibilidade e é un gran orgullo ao axudar, na medida das nosas posibilidades, para lograr este obxectivo.
Que supón o ascenso de categoría para o seu patrocinio?
Somos conscientes de que os afeccionados valoran a aquelas empresas que se comprometen cos equipos da cidade, pero non se busca un retorno económico como tal. É máis a vinculación cun proxecto que enche de orgullo aos composteláns. Que o cidadán vexa os valores da SD reflectidos na nosa empresa.
Cal é a súa relación co deporte en xeral e a SD Compostela en particular?
Durante os últimos anos, ademais da a SD, apoiamos ao Obradoiro CAB, pero o que máis nos satisfai é o apoio que estamos a dar ás categorías inferiores do fútbol base da SD Compostela, a través do patrocinio dos Campus de Nadal e Verán, nos que colaboramos dende hai varios anos.
Na SD contamos con grandes amigos, fundamentalmente o presidente, Antonio Quinteiro, e o director de marketing, Javier Puñal. Eles souberon transmitirnos os seus desexos, esperanzas e obxectivos, e nós estamos aí para axudar a conseguilos.
Un desexo para esta tempada
Que pronto podamos vernos no Vero Boquete de San Lázaro para poder celebrar as vitorias do Compos.
