- Súmanse aos catorce xogadores do primeiro plantel
- Están citados para o luns ás 10.30 horas no San Lázaro II
Santiago de Compostela, 15 de xullo de 2022
A SD Compostela arrinca a nova tempada este luns 18 de xullo e farao con nove canteiráns, do Xuvenil A e do Sigüeiro, que se sumarán aos catorce futbolistas do primeiro plantel. Todos eles poñeranse ás ordes de Fabiano e o seu corpo técnico, conformado por Cardeñosa e Sergio Castiñeiras.
Algúns dos xogadores da base citados foron habituais o ano pasado, e mesmo en cursos anteriores, nos adestramentos do primeiro equipo, debutando algúns deles na Segunda RFEF.
Do Filial, estarán presentes os defensas Ozores e Kike, o mediocentro Óscar Remuiñán, quen xogou dous encontros a campaña pasada co Compos; e os xogadores de banda Santi de Prado, quen tamén se estreou no Vero Boquete, e Yago García Escolar.
Pola súa banda, do xuvenil de División de Honra estarán o porteiro Trillo, o defensa Dani Varela, o mediocentro Goris, quen se estreou na Copa RFEF o pasado verán; e o dianteiro Iker Carril, quen foi convocado co primeiro equipo o último curso.
Todos eles están citados xunto aos catorce xogadores do primeiro plantel que contan con contrato en vigor: Pato Guillén, Borja Rey, Roque, Álvaro Casas, Pablo Crespo, Damián Canedo, Martín Salvador, Pablo Antas, Samu, Mario, Fer Beltrán, Jordan, Parapar e Pablo Durán.
