- O presidente Juan Carlos Rodríguez Gesto visitou as instalacións do Hospital HM Rosaleda para selar o acordo
Santiago de Compostela, 11 de novembro de 2022
HM Hospitales renovou a súa colaboración coa SD Compostela para a tempada 2022/23. O acordo de patrocinio selouse esta mesma semana na sede do Hospital HM Rosaleda, onde o presidente do club, Juan Carlos Rodríguez Gesto, foi recibido polo director de Relacións Institucionais e Proxectos Estratéxicos de HM Hospitales en Galicia, Rafael Silva Agregán.
No encontro, no que participou tamén Miguel Fernández, director de márketing da SD Compostela, o directivo de HM Hospitales aproveitou para desexarlle “toda a sorte do mundo á nova directiva do equipo ante unha tempada chea de retos e posibilidades”.
“Estou seguro de que serán uns meses de moito traballo e sufrimento, pero tamén de grandes alegrías” augurou Rafael Silva, quen reiterou o apoio de HM Hospitales ao deporte local, como parte esencial na promoción dun modo de vida saudable na nosa contorna máis próxima. O directivo de HM Hospitales incidiu no “obxectivo compartido que é a promoción da saúde, a través do impacto positivo que supón a actividade física e que se materializa nesta colaboración que mantemos desde hai xa moitos anos”.
Pola súa banda, Juan Carlos Rodríguez Gesto, aproveitou o encontro para destacar o apoio achegado por unha firma de prestixio na cidade, como é HM Hospitales. “Para o club é un orgullo e un pracer contar co apoio dunha entidade, con tanto prestixio e tan vinculada a Santiago, como HM Hospitales. É de agradecer que este compromiso se siga mantendo tempada tras tempada, en base ás boas relacións que hai entre ambas entidades”, sinalou o presidente da SD Compostela.
Ademais, no acto no que se rubricou a firma do novo acordo, o novo mandatario do club quixo trasladar o seu agradecemento persoal a Rafael Silva, así como ao equipo de HM Hospitales, centro médico de referencia para os xogadores do club, en particular, e tamén para todos os composteláns.
HM Hospitales
HM Hospitales é o grupo hospitalario privado de referencia a nivel nacional, baseando a súa oferta na excelencia asistencial sumada á investigación, a docencia, a constante innovación tecnolóxica e a publicación de resultados.
Dirixido por médicos e con capital 100% español, conta na actualidade con máis de 6.500 traballadores laborais, que concentran os seus esforzos en ofrecer unha medicina de calidade e innovadora, centrada no coidado da saúde e o benestar dos seus pacientes e familiares.
HM Hospitales está formado por 47 centros asistenciais: 20 hospitais, 3 centros integrais de alta especialización en Oncoloxía, Cardioloxía, Neurociencias, 3 centros especializados en Medicina da Reprodución, Saúde Ocular e Saúde Bucodental, ademais de 21 policlínicos. Todos eles traballan de maneira coordinada para ofrecer unha xestión integral das necesidades e requirimentos dos seus pacientes.
Actualmente, HM Hospitales en Galicia dispón 4 hospitais con máis de 250 camas e 23 quirófanos que responden a todas as especialidades médicas e cirúrxicas, e conta coa máis avanzada tecnoloxía de diagnóstico por imaxe. Destacan a UCI de adultos e neonatal, os servizos de urxencias 24 horas e urxencias pediátricas, a medicina nuclear e HM Fertility Center, entre outros. Estes recursos veñen sumarse aos do resto do grupo no conxunto de España, todos eles coa maior cualificación técnica e humana.
