- Na Asemblea Xeral aprobouse a entrada de 19 novos socios
Santiago de Compostela, 21 de decembro de 2022
A Sociedade Deportiva Compostela quere informar aos seus abonados e simpatizantes que, no día de hoxe, a Asemblea Xeral do Club aprobou a admisión dos novos socios, ratificando o acordo alcanzado pola Xunta Directiva o pasado 29 de novembro.
A Xunta Directiva acordou co grupo de inversores a entrada de 19 novos socios nesta Asemblea Xeral, pospoñendo a de Borja Iglesias para datas vindeiras, por razóns que el mesmo explicará.
O acordo con este grupo de inversores ten como principal obxectivo garantir a estabilidade e crecemento económico do club, aumentar a súa masa social e aspirar, deste xeito, aos máximos obxectivos deportivos, convertendo á entidade no club que, ao noso entender, merece ter a capital de Galicia.
Con estas incorporacións, abordarase en próximas datas a reestruturación que sexa necesaria na xunta directiva, así como aquelas medidas que sexan necesarias para asegurar o bo devir do club.
Deste xeito, deseñarase unha folla de ruta co obxectivo de converter o club en Sociedade Anónima Deportiva. Así mesmo, realizaranse investimentos para situalo cultural, social e deportivamente coa importancia, arraigamento e peso que un club como este debe ter, non só no ámbito local senón tamén a nivel nacional. Estes investimentos estímanse, inicialmente, nun rango de 1,5 a 2 millóns de €, establecéndose, para o efecto, as fórmulas que resulten adecuadas para iso.
A través desa Sociedade Anónima Deportiva profundarase na democratización do club, dándolle preferencia na participación, en primeiro lugar, aos abonados e aos actuais dirixentes do club; en segundo lugar, ao tecido empresarial da cidade; e, en último caso, a todos aqueles que queiran participar.
Con este motivo, facilitarase á entidade o acceso a ferramentas tecnolóxicas de última xeración para a xestión deportiva e administrativa, tanto sistemas de xestión interna e relación con fans como ferramentas para análises de rendemento, deseño de estratexia, scouting…
Do mesmo xeito, tratarase de reforzar e mellorar todas as liñas emprendidas, nos distintos ámbitos, pola actual Xunta Directiva, manténdoas en canto sexa posible e non prexudique os intereses do club.
