[cs_video column_size=”1/1″ video_url=”https://youtu.be/-CnamYyxEh4″ video_width=”500″ video_height=”250″][/cs_video]
Santiago de Compostela, a 11 de Febreiro de 2017.
A pola quinta. A Sociedade Deportiva Compostela pretende continuar coa súa serie triunfal desta segunda volta sumando un novo triunfo, o que sería o seu quinto consecutivo. Para iso, terán que superar a un CD As Pontes que, a pesar de estar en postos de descenso, xa lle puxo as cousas moi difíciles aos branquiazuis, tanto na Copa Federación como no partido de Liga.
No de Copa o resultado foi de empate a un gol e en Liga a vitoria foi local por 2-1, adiantáronse os visitantes co tanto de Ibu, pero grazas ás dianas de Santi Gegunde e Diego Rey, o equipo compostelán puido lograr os tres puntos.
Con todo, na previa, o adestrador do Compos, Yago Iglesias, quixo destacar que “espero un partido máis complicado que o da casa, xa que a esas alturas non se xogaban tanto os dous equipos”. A razón: “nós queremos seguir coa nosa dinámica positiva e eles escapar dos postos de descenso”.
Ademais, o As Pontes viña “con moi mala xeira”, pero a semana pasada “semella que espertou”. Os de Marcos Roca gañaron por 0-2 ao Dubra, a pesar de estar cun home menos desde o minuto 39.
Ese expulsado foi Edy, “unha baixa moi importante para eles, porque é un estandarte para o equipo”, apunta Yago. Pola súa banda, Diego Rey, refírese á baixa deste futbolista nuns termos similares aos do técnico, aínda que matiza que “ás veces, cando tes unha baixa deste tipo, o resto de xogadores dan un pouco máis cada un para poder suplila e pode ser complicado”.
En adición, para Yago, “é un histórico da competición e están a facer partidos moi competitivos, pero o fútbol ás veces non che dá o que mereces e por iso están onde están”. O técnico tamén resalta a dificultade de triunfar en O Poboado e que teñen xogadores como Rubén Pardo “que arriba sempre che poden facer estragos”.
Con todo, tamén valora que “estamos en boa dinámica e queremos seguir con ela”. Parte de culpa dese bo rendemento, ademais do mellor axuste dos xogadores, para Diego Rey, e sobre todo no seu caso, está “na minipretemporada de Nadal”. Segundo o extremo, “logrei coller ese ton adecuado para poder realizar o meu xogo, xa que depende moito do meu físico”.
O xogador lucense está nun momento de forma espectacular, con cinco goles en catro partidos, pese “a ser sempre de dar pases”. Aínda así, Diego pensa que ten que mellorar e “ser máis ambicioso na faceta goleadora, porque me axuda á min e sobre todo ao equipo”.
Para iso, contar cun compañeiro como Recoba é un luxo, “porque nos fai mellores a todos”, e explica, “se tiro un desmarque vaimo a ver seguro e cunha precisión moito mellor que calquera outro”.
Mantendo esa “sintonía e equilibrio” das últimas semanas, tanto Yago como Diego, agardan que chegue a quinta consecutiva. O espello da primeira volta indica que hai que sumar de tres para mellorar o resultado.
CONVOCATORIA
