[cs_video column_size=”1/1″ video_url=”https://youtu.be/W7QwCBnlmIc” video_width=”500″ video_height=”250″][/cs_video]
Santiago de Compostela, a 25 de Marzo de 2017.
A Sociedade Deportiva Compostela regresará este domingo a San Lázaro e farao para xogar un encontro de nivel. O conxunto branquiazul recibirá a un Arousa que está no cuarto lugar da táboa, posto que marca o corte do playoff de ascenso, e que chega lanzado, logo de lograr tres vitorias de forma consecutiva.
Ademais, o choque cobra, se cabe, máis importancia, coa situación clasificatoria actual. O Compos necesita unha vitoria para achegarse á zona nobre, mentres que o Arousa tentará afastarse dos seus inmediatos perseguidores.
Con isto mente, plantel e corpo técnico están convencidos de que os tres puntos quedarán na casa, mellorando desta forma o resultado de empate a cero da primeira volta en Vilagarcía.
“É un partido moi importante no queremos seguir coa boa imaxe mostrada na casa. Por iso, temos moitas ganas de que chegue o domingo”, explicou Yago Iglesias.
O técnico recalcou que, a excepción do Deportivo B e Rápido, “todos os equipos que chegaron a San Lázaro por encima perderon e esperamos que sexa así outra vez”. De ser así, “poñeríase a liga moi bonita, xa que hai moitos enfrontamentos directos nas últimas xornadas”.
De todos os xeitos, para poder logralo, o Compos terá que superar a un gran conxunto “con moi bos xogadores e que ten un obxectivo desde principio de tempada, meterse entre os catro primeiros”.
Para Yago, o Arousa é un equipo “moi compensado, batallador, xa que conseguiu moitos puntos nos últimos minutos, e cun adestrador experto”. Por esta razón, será vital que o equipo estea concentrado ao 100%.
Individualmente, o técnico ribeirense destaca “a súa capacidade goleadora, con Hugo Soto e Sylla, e o seu control de balón, con Julio Rey”. Pola súa banda, o mediocentro Alberto Lamas ‘Make’, resalta “a súa contundencia defensiva, a verticalidade por banda e a experiencia dalgúns futbolistas”.
Parar a eses xogadores será capital para que a afección santiaguesa volva saborear outro triunfo. O plantel está convencido de que a fazaña é posible e confía no apoio do público para que os tres puntos queden na casa. Os que acudan ao campo verán un partido de categoría, nun escenario magnífico. No “Día do Club”, a vitoria terá que ser local.
