-
Cuarta semana consecutiva positiva para o equipo de Marcos Donnici.
Santiago de Compostela, ao 18 de decembro de 2017.
A xornada do sábado para as categorías inferiores pechouse con tres vitorias, a do xuvenil na visita a Boiro e a dos dous infantís, contra a Escola de Fútbol de Boqueixón e a Escola de Fútbol de Silleda, respectivamente.
En primeiro lugar, o Zona Vella volveu xogar tralo parón polo temporal, pero viuse superado no seu feudo polo Montaos. Os visitantes estiveron sempre por diante no marcador, e a pesar de que Javi Varela recortou diferenzas na segunda metade, o Montaos sentenciou ao final do choque.
O xuvenil Nacional, tras superar a semana pasada ao CD Lérez volveu marcar catro tantos para sumar tres novos puntos. Os pupilos de Donnici comezaron moi fortes o choque e aos treinte minutos xa ían gañando cun dobrete de Yago Torrente. Antes do descanso, o Boiro recortaría distancias, pero na segunda metade Marcos Mella e Darío Gontán ampliarían as diferenzas. Con este resultado, o equipo ascende á nóvena praza da clasificación.
En canto ao xuvenil B e o cadete ambos sufriron idéntico resultado e contra o mesmo equipo. O primeiro en casa e o segundo fóra perderon por 0-6 contra o EFM Concello de Boiro.
O Infantil A recuperou a confianza cunha gran goleada por 9-3 ante a Escola de Fútbol de Boqueixón. Desde o comezo, os branquiazuis demostraron a súa superioridade, colocándose cun seis a cero a favor á media hora. Na segunda parte o partido igualaríase.
Pola súa banda, o Infantil B deu un golpe de autoridade na mesa ao superar ao EF Silleda, primeiro clasificado da súa liga ata esta xornada. Os branquiazuis foron por diante no marcador desde o inicio, non baixando a diferenza de dous goles desde o minuto 38.
