-
O xogador cinco estrelas da primeira volta amplía a súa vinculación por un ano
Santiago de Compostela, a 26 de Xuño de 2019.
A SD Compostela 2019/20 suma unha nova peza ao seu proxecto camiño á Segunda División B. Brais Abelenda Negreira, xogador cinco estrelas do Compos da primeira volta do campionato, amplía a vinculación co club por un ano, polo que cumprirá a súa segunda campaña ás ordes do corpo técnico dirixido por Yago Iglesias.
O extremo de Val do Dubra foi un dos xogadores máis utilizados na súa posta de longo como branquiazul, o que o levou a recibir a distinción citada por parte da afección. O seu rendemento quedou palpable xa na pretempada, na que se destacou como o pichichi, anotando catro tantos na Copa Deputación conquistada e algún máis nos amigables. E durante o curso, as súas cifras aumentáronse con 12 goles máis, a pesar de actuar maiormente desde a banda esquerda.
Ao final foi un dos poucos xogadores do plantel que superou os 3.000 minutos de xogo, divididos en corenta e tres encontros oficiais, nos que en corenta saíu no once inicial.
Con 23 anos, cumprirá 24 en novembro, será o seu segundo curso en Santiago e o cuarto en Terceira División, categoría na que acumula 84 partidos, aos que acompaña doutros 45 en Segunda B, divididos en dúas campañas no Racing Club de Ferrol.
Con Brais, o equipo conta xa con doce integrantes, con dez renovacións, un regreso de cesión e unha fichaxe. Forman parte do grupo que dirixirá Yago: Alberto Freire, Álvaro Casas, Álvaro Naveira, Anxo Pérez, Gabri Palmás, Jorge Queiruga, Josiño, Mon, Samu, Saro e Sergio Pereira.
