- O lateral analizou a previa do partido ante a Gimnástica en Joyas del Camino, o seu patrocinador e do encontro do sábado
Santiago de Compostela, 3 de novembro de 2022
Na histórica Praza de Praterías, tan simbólica para a SD Compostela, Martín Salvador analizou a previa do partido deste sábado, un duelo ante a Gimnástica de Torrelavega que estará patrocinada por Joyas del Camino. Acompañado de Charo Soltero Mayor, o lateral navarro apuntou a importancia de sumar os tres puntos diante da afección.
Así mesmo, o acto serviu de presentación da nova marca que acompaña o proxecto da SD Compostela. “Joyas del Camino é un espazo en liña, que tamén ten unha localización física en Santiago, na emblemática Praza de Praterías. É unha marca que trata de vincular a artesanía do Camiño e de Compostela, coa tradición, a calidade e o comercio sostible”, sinalou a súa xerente.
Ademais, dada a súa vinculación á capital galega, apostaron por unirse ao Compos, co obxectivo de seguir crecendo da man. “Tratamos de colaborar cos proxectos deportivos da cidade, neste caso o Compos, porque entendemos que tamén son parte fundamental do éxito do Camiño”, explicou Charo.
Do mesmo xeito, Martín Salvador, ademais de agradecer o compromiso de Joyas del Camino, analizou a previa do duelo deste sábado no Vero Boquete.
Gañar en Carballo. A semana afróntase moito mellor despois dunha vitoria. Outras semanas non conseguimos os resultados, pero o equipo está cada vez mellor, este domingo chegou o resultado e seguiremos traballando para que sigan chegando as vitorias.
Partido ante o Torrelavega. Tanto animicamente como pola clasificación, conseguir os tres puntos sería un gran alivio. A semana seguinte temos descanso e viríanos ben para cargar as pilas ao 100% e volver con forza para o seguinte partido ante o Arenteiro.
Pelexar con todo. Esperemos facerlles dano desde o minuto un, ademais na casa. Coa afección apoiándonos temos que dar o 200% e iso faremos.
