A S.D. Compostela asinou táboas ante o Burgos C.F. nun encontro sen goles e sen demasiadas ocasións. Ambos equipos sumaron un punto que sabe a pouco malia a necesidade de vitoria para os dous conxuntos.
Os homes de Fredi levaron a iniciativa na primeira parte e malia que foi un partido sen demasiadas ocasións, a S.D. Compostela tivo as súas mellores oportunidades con dúas boas accións xeradas polo xogador portugués João Camacho. A primeira delas ao transcorrer o primeiro cuarto de hora, Camacho disparaba raso e con potencia á portería defendida por Toni, pero o balón marchábase pegado ao poste. O xogador de Madeira non desistía na súa intención de abrir o marcador e pouco despois, no minuto 25, volvía poñer en apuros a Toni cun disparo cruzado que despexou o porteiro do Burgos cunha boa estirada.
Malia a insistencia da S.D. Compostela, con falta de acerto para finalizar as xogadas, o Burgos tamén deu o primeiro susto en San Lázaro co disparo de Juan Fran que Pato lograba despexar cos dedos enviando o esférico pegado ao pau por moi pouco.
Fito Miranda tivo a última oportunidade do primeiro tempo cun disparo que atrapaba de novo Pato sen problemas no minuto 37. Con todo, o Compostela aínda era o equipo que máis chegadas xeraba, pero os de Ángel Viadero, que pechaban liñas constantemente, impedían calquera oportunidade dos locais.
Tralo paso por vestuarios, Fredi apurou cambios substituíndo a Javi Moreno por Fondevila coa intención de procurar distancias para que o Burgos se abrise. Tamén saltou ao terreo de xogo Bicho coa intención de provocar unha reacción: “Buscábamos que a segunda metade fose máis aberta”, asegurou Fredi en sala de prensa.
O equipo burgalés volveu ao campo con maior actitude defensiva e apuraba as contras que ameazaban a portería da Esedé, pero Pato, que asinou un bo partido, repelía os balóns do rival, como o disparo de Jose Fran no minuto 60 desde a frontal do área que despexou nunha gran estirada.
Os locais, a pesar do cansazo físico e psicolóxico, tiveron as últimas oportunidades para cambiar o marcador nunha boa acción de Guillem que finalmente desbaratou Toni ou o disparo envenenado de Bicho no minuto 88 que se marchaba desviado por moi pouco.
Os últimos minutos de idas e vidas por parte de ambos equipos non cambiaron o resultado e o árbitro pitaba o final do partido cun reparto de puntos. Para Fredi, o adestrador da S.D. Compostela “o resultado é xusto, o Burgos fixo un bo partido e nós non estivemos ao nivel. Viuse a necesidade do Compostela a nivel psicolóxico”, asegurou en rolda de prensa.
O vindeiro domingo ás 17:00h a S.D. Compostela medirase ante o C.D. Guijuelo no Estadio Municipal de Guijuelo, onde os homes de Fredi veranse na obrigación de pelexar por unha primeira vitoria a domicilio que lles permita manterse vivos.
FICHA TÉCNICA
S.D. COMPOSTELA (0): Pato, Josu, Jimmy, Javi Moreno-(Fondevila, min 46), Portela, Sergio Sánchez, Jordan-(Goti, min 66), Manu Rodríguez, Guillem, Joaquín-(Bicho, min 57), Joãou Camacho.
BURGOS C.F. (0): Toni, Andrés, Julen Cstañeda, Carlos, Odei, Rodri, Jose Fran, Zarandona, Camochu-(Adrián Hernández, min 66), Ander Vitoria-(Pepe Delgado, min 87), Fito-(Sergio Cortés, min 70) Miranda.
GOLES: Empate a ceros.
ÁRBITRO: Rubén Jiménez González do Comité Territorial das Palmas amonestó con tarxeta amarela por parte do Burgos C.F. a: Andrés (Min 54), Rodri (Min 57), Ander Vitoria (Min 58) e Julen Castañeda (Min 79).
Por parte da S.D. Compostela amonestou con tarxeta amarela a: João Camacho (Min 74).
INCIDENCIAS: Partido correspondente á 28ª xornada de liga disputado no Estadio Municipal de San Lázaro ante 768 aistentes.
