Santiago de Compostela, a 5 de Xullo de 2016.
A SD Compostela pechou esta mañá a incorporación de dous novos xogadores. Juan Bautista Rey, procedente do xuvenil da SD de Liga Nacional, e Martín González Rodríguez, que militou o curso pasado no CCD Cerceda, son as dúas caras novas do conxunto que dirixirá Yago Iglesias para esta nova tempada.
Martín González (08/11/1991) é un extremo de 24 anos que pode actuar por ambas bandas. Xogador nado en Santiago de Compostela, Martín regresa ao club co que debutou en profesionais para cumprir a súa quinta tempada en terceira división.
Co Compos disputou dúas temporadas, sendo partícipe dos seus dous ascensos consecutivos. No curso do ascenso a segunda división B, con tan só 20 anos, disputou 22 partidos anotando catro goles.
Posteriormente foise ao Ordes, onde xogou 37 encontros nos que marcou dez goles, cifras que o levaron a un dos galos da categoría no verán do 2014, o Cerceda. Alí, cumpriu dúas tempadas nas que participou en 68 encontros, 43 deles de titular, anotando dez goles.
Pola súa banda, Juan Bautista Rey (06/04/1997) é un interior dereito procedente das categorías inferiores do equipo. Recentemente terminada a súa etapa como xuvenil, Juan Rey ascende ao primeiro equipo, co que xa disputou o curso pasado catro encontros.
Na súa última tempada, o xogador de 19 anos participou en 28 encontros, todos eles como titular, anotando 21 dianas, converténdose así no segundo máximo goleador da categoría e sendo o estandarte dun xuvenil que rematou a liga en cuarta posición, con 60 puntos.
Con estas dúas novas incorporacións, son xa once os xogadores que conforman o primeiro plantel da SD Compostela para o novo curso, unha cifra que aumentará nas próximas horas.
