- Yago Iglesias: “En dúas/tres semanas veremos ao mellor Compos”
- A SD Compostela enfrontarase a un Ribadumia que pretende ser un dos equipos que pelexen polo playoff.
Santiago de Compostela, ao 26 de agosto de 2016.
Volve o fútbol a San Lázaro. O Estadio santiagués volverá gozar do Compos na nova tempada. Ben é certo que xa se xogaron dous partidos en pretemporada, pero este é un encontro de Liga, o campionato onde se esperan mellores resultados.
Cúmprense xa tres meses e medio do último choque en San Lázaro. Aquel Compostela catro Astorga 1, que significou o adeus da SD á categoría de bronce do fútbol español. Daquel equipo só queda Mon, precisamente autor dun dos goles locais ese día.
111 días máis tarde, os obxectivos e a ambición son outras. Cun equipo totalmente novo e rexuvenecido, con Yago Iglesias como director, o Compos busca asentar as bases dun conxunto de futuro que poida render ao máximo nivel en Terceira División e que teña a posibilidade de regresar a Segunda B máis pronto que tarde, pero sempre cos pés na terra.
O camiño non será fácil, como así o puidemos comprobar coa dura derrota en Abegondo, por cinco goles a un. Con todo, aínda restan 37 xornadas para endereitar o rumbo.
Buscando un borrón e conta nova, o Compos enfrontarase en San Lázaro, mañá ás 19:30, a un Ribadumia con varias fichaxes de nivel, que o converten nun equipo prometedor que loitará por entrar entre os catro primeiros postos.
“Un dos equipos que pola proposta de xogo máis chama a atención. Fixo cinco/seis fichaxes moi bos para a categoría. Un equipo experto, moi competitivo, dos que por teoría deberían estar arriba”, comenta o adestrador Yago Iglesias.
O técnico analiza así aos novos fichaxes do Ribadumia: “Teñen a Changui, que foi o máximo goleador o ano pasado. A Rafita, que ven do Alondras, Camiño e Fandiño que veñen do Arosa e son na súa posición do nivel máis alto da categoría”. Precisamente, unha das súas incorporacións, Adrián Camiño, foi o autor do único gol que lles serviu para gañar ao Dubra a semana pasada.
En canto á proposta de xogo máis propicia para o encontro, Yago teno claro“A mellor maneira de defender é ter o balón e atacar nos. Un equipo que manexa ben o balón e teno máis que o rival, ten máis posibilidades de gañar. Outra cousa é como xestionalo e como reaccionar cando non o tes”.
Con todo, Yago pide paciencia co equipo xa que o mellor nivel está por chegar. “Entre semana tivemos un partido contra o Depor, por iso xogamos a segunda parte con xuvenís, pensando no Ribadumia. O equipo non vai chegar ao 100%, porque evidentemente é pronto, pero van a chegar frescos. Hai que ter paciencia porque o mellor Compos vaise a ver dentro de dúas/tres semanas”.
Por último, Yago reclama o apoio da afección, xa que será importante para eles. “Oxalá teñamos un San Lázaro en canto a entrada como este martes e animando como o fixeron, ou como o día do Somozas, que foi unha boa entrada pese a que o horario non axudaba, ou como o outro día en Abegondo, que a xente fíxose sentir e animando, que para nós é fundamental”.
Esta debe ser a tónica a seguir, xa que segundo o técnico lle axudará moito para acadar bos resultados. “Ao largo do ano, contra os equipos que veñan, xa non so o campo, senón tamén a afección teñen que axudar moito”.
