– As vitorias dos infantís, ante o Lalín e o Amio, foron as únicas notas positivas da xornada.
Santiago de Compostela, ao 4 de setembro de 2016.
Mala xornada para as categorías da base da SD Compostela. Só as goleadas dos dous equipos infantís, impediron unha fin de semana aciaga en canto a resultados, onde fóra das dúas vitorias e o empate do xuvenil de Liga Nacional, o resto foron derrotas.
Precisamente, os xuvenís seguen sen coñecer a vitoria no que vai de campionato. Os pupilos de Vecho sumaron un punto nun campo complicado como é o do Ourense CF, pero seguen sen lograr esa vitoria que lle faga subir na clasificación.
Os goles de Jorge Rama, no minuto 11, e de Alberto Cores, no 37, non foron suficientes para conseguir os tres puntos no Municipal de Oira, co que a SD queda establecida no posto 15, con tres puntos, nunha clasificación que lidera o Pontevedra. Para a semana, visitará o campo das Cancelas o Arousa.
En canto ao xuvenil B, perdeu por un gol a catro ante o Vitoria FC, e iso que se puxeron por diante no marcador no minuto 9 co gol de Daniel Seijas. Con todo, os visitantes remontaron e levaron un triunfo que deixa ao Compos na última posición da táboa.
Os cadetes sufriron unha inesperada derrota ante as Escolas Deportivas do Arzúa por tres goles a un, un tropezón que lles fai descender ao oitavo posto da clasificación.
Pola súa banda, os infantís, tal como dixemos anteriormente, si que triunfaron, e de que forma! O A gañou de forma avultada ao EF Lalín, por cero goles a nove, no campo Anexo Manuel Anxo Cortizo.
Catro goles de Anxo Ferro, e un de Iago Fernández, Martín Díaz, Carlos Permuy, Samuel Gutiérrez e Mauro Iglesias selaron a goleada que sitúa ao equipo en quinta posición.
O B gañou na casa, 5-1 ante o Amio. Un gol de Xaime Paz e Carlos Permuy e un hat trick de Alejandro Dopazo fixeron vibrar aos afeccionados das Cancelas, que ven como o seu equipo ascende ao cuarto posto.
Por contra, os alevíns non tiveron tanto éxito no seu debut ligueiro. O A perdeu por dous goles a cero contra o CD Conxo, un resultado que rapidamente quere esquecer cun triunfo este mércores ás 19:00 no Campo das Cancelas contra o Vitoria FC.
O B tamén perdeu contra o AD Manuel Peleteiro, pero por un gol a tres. O tanto branquiazul anotouno Etien Pignol.
Por último, o benjamín caeu derrotado por dous goles a tres ante o Milladoiro. Tras unha vitoria no primeiro partido por dous goles a un, neste encontro, os dous goles de Alejandro Prado e Mauro Crespo non foron suficientes para lograr os tres puntos. Co resultado, o conxunto cae ao sétimo posto dunha clasificación que lidera a ED Xuventude Oroso.
