Santiago de Compostela, a 15 de Novembro de 2016.
Fin de semana dispar en canto a resultados entre as categorías base da SD Compostela. Uns partidos dos que destacamos, sen dúbida, a segunda vitoria do campionato do xuvenil dirixido por Vecho.
O xuvenil de Liga Nacional segue coa súa boa xeira, despois de que gañasen fora de casa ante o Lugo. Despois do empate en As Cancelas contra o Porriño, o Compos fixo moi bo ese punto contra o segundo clasificado, cunha vitoria en terras lucenses, o que lles permite escalar na clasificación ata o décimo cuarto posto, fóra do descenso.
A vitoria ante o Lugo produciuse nun encontro que dominou de punta a cabo, grazas ao dobrete de Lexis García e aos goles de Borja Márquez e Aitor Fernández. Un 0-4 final que lles permite sumar dez puntos na clasificación.
Para mellorar ese posto e eses puntos, o próximo fin de semana, o xuvenil enfrontarase ao Barbadas, décimo sétimo con seis.
Peor sorte correron os do xuvenil B, que caeron contra o líder invicto, o Sporting Estrada, por cero goles a tres. Unha derrota asumible coa que descenden ao decimoterceiro posto, o cal tentarán mellorar ante o Cordeiro CF, décimo sexto con 10 puntos.
En canto ao cadete, gañou remontando á SD Cruces por 2-3. Os goles de Rodrigo Guada e Cristian Cerbán, serviron para empatar o encontro, mentres que Marcos Andrade selou a remontada no minuto 80. Décimos na táboa, enfróntanse este finde ao Crocha.
O que non puido manter a súa boa serie foi o Infantil A, que perdeu ante o Boiro, a pesar de que se adiantou cun gol de Gerardo Lago no minuto 1. Con todo, os da Barbanza remontaron para o 2-1 final.
Agora, o equipo santiagués está terceiro a catro puntos do líder, o Amio SD, ao que se enfrontarán precisamente este sábado ás 10:15.
Pola súa banda, o Infantil B empatou en casa ante o A Baña SD, cun gol de Carlos Permuy nos últimos minutos. Un punto que os coloca sétimos. Esta fin de semana descansarán.
Tampouco tiveron boa sorte os alevíns. O A caeu ante o líder, o Santiago de Compostela, por 1-2, aínda que se manteñen quintos. O gol local foi obra de Alejandro Dopazo. Mentres que o B, perdeu ante o Conxo por 2-0, e agora marchan novenos.
A próxima fin de semana, buscando recuperar sensacións, enfrontarase ao Amio o A, mentres que o B descansará.
Por último, o Benxamín tamén perdeu por 1-4 ante o Villestro SD. O gol dos branquiazuis foi obra de Mauro Crespo. A próxima fin de semana xogarán contra o Racing San Lorenzo.
