Santiago de Compostela, a 13 de Decembro de 2016.
Nunha fin de semana en que tanto alevíns como benxamíns descansaron, o resto de categorías da base da SD Compostela non tiveron o seu mellor día, xa que tan só o Infantil A conseguiu gañar e o Infantil B empatar.
Do mesmo xeito que a semana anterior, o Xuvenil de Liga Nacional caeu por dous tantos a cero ante o Racing Club Villalbés. Unha visita complicada para os de Vecho ao campo da Roca que se liquidou con vitoria local por dous goles a cero, cos tantos de Cadenas e Alberte.
Con este resultado, o conxunto santiagués descende ao décimo quinto posto, xusto por encima do descenso, aínda que ten por diante tres equipos que están a tan só un. Por tanto, esta fin de semana ante o CD Choco, rival que está por baixo na clasificación, tentarán recuperar eses postos.
Pola súa banda, o Xuvenil B non puido manter a súa boa xeira e perdeu na casa por un gol a dous ante a UD Bastavales. O gol de Adrián López no minuto 80 foi insuficiente para sumar algún punto.
O sábado ás catro, na Tilleira, o rival será o Dubra SD, un duro contrincante que está segundo na clasificación con 36 puntos.
Tampouco puido sumar o Cadete na súa visita ao Novo Campo do Milladoiro, no que perdeu por dous goles a cero ante o equipo local. Décimos na clasificación xogarán este domingo ás 12:15 nas Cancelas contra o CD Boiro, undécimo cun punto menos que o Compos.
Na parte positiva, o Infantil A seguiu sumando de tres cunha gran vitoria, precisamente, no Novo Campo do Milladoiro. Os branquiazuis superaron ao equipo anfitrión por un gol a dous, cos goles de Mauro Iglesias e Carlos Permuy, remontando así o gol inicial de Miguel Gato.
Actualmente cuartos, enfrontaranse á UD Bastavales o sábado ás 11:15 en A Merced, Conxo.
Do mesmo xeito, o Infantil B sumou un punto, aínda que en casa, ante o SR Calo. O Compos púxose por diante co gol de Iván Vilaseco no 60, pero o cadro visitante conseguiu empatar no último minuto.
Esta fin de semana, na Cañoteira (Cacheiras), mediranse á SD Cacheiras o sábado ás 11.
