Santiago de Compostela, a 17 de Febreiro de 2017.
A fichaxe que faltaba. A SD Compostela ten desde hoxe un novo patrocinador principal, logo de asinar con MC Interiorismo Modular, unha empresa con dez anos de experiencia especializada nos biombos divisorios de oficina.
Xa para o partido do Dubra, os equipamentos do Compos contarán coa nova imaxe, a “dunha empresa nova, de Santiago, con futuro que pensa e cre no novo proxecto do Compostela”, define o presidente Antonio Quinteiro.
Este novo patrocinador foi presentado esta mañá ante os medios, na sede da propia empresa, no polígono do Tambre, nun acto no que estiveron presentes o xerente da firma, Manuel Pedrares, o presidente da SD Compostela, Antonio Quinteiro, e o director de márketing do club, Javier Puñal.
O máximo dirixente do Compos quixo agradecer o sacrificio de MC pola entidade e tamén comentou que espera “recompensar o seu esforzo polo club, con darlle a presenza que merece a empresa e que ao final da tempada, se somos capaces, trasladar a súa imaxe non só polo territorio galego, senón tamén pola xeografía española nun playoff de ascenso”.
Para este novo proxecto de cidade que instaura o Compos “é necesario ser apoiado polas empresas para que poida saír adiante”. Por iso, Antonio Quinteiro agarda que “este exemplo de sacrificio e confianza sexa trasladado ao resto de empresarios e que aos poucos vaiamos unindo forzas para el”.
Pola súa banda, Manuel Pedrares recoñeceu que “é un esforzo importante, pero con este apoio buscamos axudar ao club e ao mesmo tempo facer marca como empresa, porque está claro que o Compostela é un equipo con moito tirón”.
De momento o convenio é por un ano aínda que, como explicou o presidente, “desexamos que queden contentos e sigan para o ano”.
Así mesmo, o xerente de MC valora moito a imaxe da empresa e cre “que con este patrocinio se vai mellorar”. A pesar da categoría, como indicou Javier Puñal, “o noso equipo ten un gran tirón desde o punto de vista comunicativo”.
Así, o director de márketing do Compos, agradeceu a MC Interiorismo Modular que os elixise como “vehículo de comunicación para facer marca”.
Por último, Javier tamén destacou que a marca santiaguesa é unha empresa “que cre firmemente na responsabilidade social corporativa, traballando para a súa cidade e mellorándoa”. Desde xa, forma parte do club de empresas do Compos, a SD Empresarial.
