Santiago de Compostela, a 31 de Marzo de 2017.
Un partido trampa. A SD Compostela visitará este domingo o campo de Vista Alegre para enfrontarse a un Ordes que, a pesar de xa estar descendido, busca acabar a tempada da mellor maneira posible.
Tras a súa clara vitoria na casa ante o Arousa, os mozos de Yago queren repetir premio, sumando desta forma o seu terceiro triunfo de visitante da tempada.
A tarefa non será sinxela, pero Yago está convencido de que o plantel sabe da importancia desta final. “Recalcamos toda a semana niso e os xogadores van saír mentalizados, sabendo a importancia que ten o partido para nós”, aclara o técnico.
Os branquiazuis teñen ganas de que neste tramo do curso “volvan esas vitorias de visitante, xa que é importante co que nos estamos xogando”. Os tres puntos significarían “seguir na loita por entrar no playoff, o cal é moi bonito”.
Iso si, Yago Iglesias recalcou que “a idea é a mesma. Queremos quedar o máis arriba posible, pero sempre con moita humildade”.
Aínda así, existe moita ilusión no grupo xa que “estamos a empezar a ver o Compos que todos queremos, un equipo que sabe manexar os tempos de partidos, que é efectivo, vertical e que sabe dominar coa pelota”.
Este Compos é o que Yago e todos queren ver ante un Ordes “que sairá moi arroupado”. En palabras de Yago, “é un equipo tácticamente moi equilibrado e correcto, e terá a motivación extra de xogar contra o Compos, repetindo a boa imaxe que mostraron en San Lázaro”.
Ao mellor Compos da tempada espéralle un partido que pode deixar ao equipo nunha situación inmellorable. Traer os tres puntos de Vista Alegre, o obxectivo. Buscamos ao mellor Compos viaxeiro.
