Santiago de Compostela, a 2 de Abril de 2017.
Segunda semana consecutiva sumando de tres e o playoff a un punto. O Compos goza agora mesmo da vitoria conseguida ante o Ordes en Vista Alegre por un gol a dous.
Nun partido dominado de principio a fin polos visitantes, o resultado complicouse cun gol de Manu de penalti na única oportunidade local en todo o encontro. Con todo, o Compos tirou de casta e oficio e conseguiu remontar con dous tantos de Martín e Nogueira.
Sabía o Compos da importancia do partido desta tarde, un duelo trampa que lles podía catapultar na clasificación, e por iso saíron cos cinco séntidos postos desde o minuto cero. Esta concentración viuse reflectida na posesión e ocasións iniciais dos nosos.
Un Ordes embotellado tentaba por todos os seus foros que os visitantes non anotasen. En 15 minutos puidemos ver ata tres goles, pero tanto Recoba, Rubén e Santi Gegunde non acertarían co fondo das mallas.
Estas oportunidades serían o preludio das tres máis claras da primeira parte. Nun córner, Alberto sacaba co pé o cabezazo do omnipresente David Uña. Catro máis tarde, Rubén desaproveitaría unha cesión perfecta de peito de Santi, mandando a volea fóra, mentres que no 33, Diego Rey non era capaz de acertar co arco nun balón en boca de gol.
O gol estaba ao caer, con todo chegouse ao descanso sen tantos e a saída do mesmo, a hecatombe. Cesión de Uña para Lucas que rouba Darío e Lucas tira co dianteiro, cometendo penalti, unha pena máxima que anotaría Manu, ao centro e arriba.
Tocaba remontar, quedaban 40 minutos. Yago moveu pezas e estas responderon á perfección. Un minuto máis tarde de que Taboada fallase un cabezazo só, Martín, que entrara por Rubén, anotaba o tanto da tarde. Combinación pola esquerda, e o interior santiagués saca a súa clase a relucir cun tiro ao segundo pau que entrou pola escadra.
A motivación do gol levou ao Compos a envorcarse máis, aínda que parecía que o balón non quería entrar, xa que Santi por dúas veces non atoparía a meta, primeiro cun tiro virándose e despois con outro remate de socato. Tampouco sería quen de marcar Saro, aínda que o seu disparo foi despexado por Alberto de forma excepcional.
Pero no 83 chegaría o que todos estabamos a esperar. Foi nunha xogada embarullada. Centro de Diego Rey, o balón queda morto na área e Nogueira, máis listo que ninguén, adiantábase e empuxábaa ao fondo das mallas.
O muro fora derrubado. O Compos remontara o partido e xa non se escaparía. Posesión infinita, algunha ocasión máis para o terceiro, e os tres puntos que voaban para Santiago.
Coa terceira vitoria de visitantes, o Compos sitúase a un punto do playoff e encara a recta final do campionato nunha condición inmellorable. Seis finais coas que esperan entrar no playoff. O soño está preto. Haberá que derrubar máis muros como o de hoxe.
FICHA TÉCNICA
1- Órdenes SD: Alberto; Juan, Adrián, Rubén, Pablo; Alberto, Misik (Martín, m.84); Víctor (Rodrigo, m.70), Manu, Jacobo (Abel, m.46); e Darío.
2- SD Compostela: Lucas; Saro, Uña, Taboada, Cabrejo; Ube (Nogueira, m.77), Mon; Diego Rey (Make, m.84), Recoba, Rubén (Martín, m.60); e Santi Gegunde.
Goles: 1-0: Manu, min.47; 1-1: Martín, min.65; 1-2: Nogueira, min.83.
Árbitro: Pastoriza Iglesiaas, colexio lucense. Expulsou a Adrián por dobre amarela. Ademais amoestou a Juan, Pablo, Darío e Víctor, polos locais, e a Lucas e Mon, polos visitantes.
Incidencias: Partido da trixésimo segunda xornada de liga de Terceira División disputado no campo de Vista Alegre ante 400 espectadores, douscentos deles santiagueses.
