[cs_video column_size=”1/1″ video_url=”https://www.youtube.com/watch?v=WHUKotcgMM8″ video_width=”500″ video_height=”250″][/cs_video]
Santiago de Compostela, a 29 de Abril de 2017.
Coa xornada acabada, co consecuente risco de ter perdido a posibilidade de seguir loitando polo playoff, o luns Cerceda e Compostela enfrontaranse no Roxo, nun duelo entre dous dos equipazos desta Terceira División Galega. O partido da primeira volta demostrou a calidade que atesouran ambos os conxuntos e este non será menos.
A pesar de que a clasificación sorriu claramente para os locais desde o partido de San Lázaro, espérase un duelo moi igualado, similar ao vivido en terras santiaguesas, con dous conxuntos que lles gusta o bo trato de balón e nun campo que permite gozar do bo fútbol.
Naquel encontro vivido nos festivos de decembro, o resultado fóra de vitoria branquiazul por dous goles a un, con dous tantos de Tomás nos primeiros instantes e un penalti detido por Lucas no último minuto, que salvou o empate.
Agora, cinco meses máis tarde, Yago espera un resultado similar. “Na ida gañámoslles facendo moi bo partido, así que sen presión e ataduras de xornadas pasadas, espero que deamos a nosa mellor versión”, explica.
O adestrador quere que os seus mozos “acaben a tempada da mellor maneira posible”, xa que “temos que seguir poñendo banzos para as seguintes tempadas”. Aínda que non se xoguen o playoff, “pertencemos a un club grande e con moita historia e non imos deixar de pelexar ata o último minuto”, asegura.
Nunhas palabras similares ao técnico, o dianteiro Santi Gegunde, autor do primeiro gol ante o Choco, destacou que o grupo “quere lavar a imaxe destas últimas xornadas, sobre todo nos partidos da casa”.
En canto ao rival deste luns, o Cerceda, Yago asegura que é un equipo “como a clasificación e historia di”. Para o técnico ribeirense, é un conxunto con “moito potencial e moi bos xogadores”. Sabe ademais, que sendo o partido o luns, quizais xa estean clasificados matematicamente para o playoff, polo que “se cadra xa pensan nel, dando descanso a xogadores importantes”.
Pola súa banda, o dianteiro lucense, espera un Cerceda “que xogue o balón desde atrás, xa que é a filosofía do seu novo técnico”. Por iso, o conxunto branquiazul quere “dominar coa pelota para que eles sufran”.
Será o primeiro rival dos tres que quedan nun final de tempada, no que Yago fará “un 50/50 con todos os xogadores do plantel, escollendo a aqueles que mellor se adapten á formulación do partido”. Iso si, os que saian ao campo “darán o 100% por quedar o máis arriba posible”.
Deste xeito, plantel e corpo técnico esperan sumar un importante triunfo ante un duro rival no Roxo. A tarefa non será nada sinxela, pero o equipo encara o choque con moito optimismo. Buscarán recuperar a senda da vitoria, nun campo complicado.
