-
O lateral dereito de Santa Comba firma ata xuño de 2019.
Santiago de Compostela, a 15 de Xuño de 2017.
Terceiro lateral para Yago Iglesias. Sergio Pereira Blanco (Santa Comba, 06/11/1996) convértese na terceira incorporación da SD Compostela para a tempada 2017/18. Do mesmo xeito que a segunda delas, Sergio é un lateral, neste caso dereito, de 20 anos e que procede do Somozas, equipo co que xogou na Segunda División B. O mozo coruñés, canteirán do Deportivo, firma por dúas tempadas, ata xuño de 2019.
Sergio é un lateral dereito de gran percorrido, aínda que tamén pode actuar na posición de interior dereito. Chega para competir na demarcación con Saro, buscando o club, deste xeito, que ambos consigan mellorar ao compañeiro.
O xogador de Santa Comba procede do Somozas de Segunda División B, onde xogou o curso pasado tras ser fichado do Silva SD. Na tempada, Sergio disputou un total de once partidos de Liga e dous de Copa Deputación. Na competición doméstica, saíu en nove encontros desde o once inicial, xogando 792 minutos, nos que recibiu catro cartóns marelos. Con el no campo, o Somozas gañou dous encontros, empatou catro e perdeu cinco.
Antes do seu paso por terras ferrolás, Sergio destacou no seu debut na categoría sénior no Silva, paso que deu ao saír do xuvenil de División de Honra do RC Deportivo da Coruña. Co equipo silvista, participou en 26 encontros, 19 deles de titular, axudando ao club a conseguir unha clasificación histórica na Terceira División. Acabaron a tempada no décimo terceiro lugar, salvando con folgura a categoría.
Tras este breve paso por Segunda B, Sergio busca recuperar sensacións na Terceira División, nun proxecto ambicioso como o do Compostela, xa que o seu obxectivo está posto no playoff de ascenso. Coa súa firma, convértese no décimo quinto xogador con ficha do primeiro plantel e no terceiro xogador adquirido, tras as fichaxes de Álvaro Casas e Álvaro Naveira.
