- O xogador coruñés definiuse como un lateral ofensivo, pero que tamén se pon o mono de traballo atrás.
- Aurelio Novoa, xerente de Compostela Concesionario, confirmou a continuidade de Kia outro ano como patrocinador oficial do club.
Santiago de Compostela, a 14 de Xuño de 2017.
Álvaro Naveira xa está aquí. O mozo coruñés foi presentado esta mañá como novo xogador da SD Compostela, na sede de Compostela Concesionario S.L. O lateral, que asinou por un ano, estivo acompañado polo director deportivo, Manuel Castiñeiras, e o xerente da empresa compostelá, J. Aurelio Novoa.
O futbolista declarou que, tras a chamada do Compostela, non dubidou un instante en asinar: “En tres días resolveuse todo”. Esa rápida decisión debeuse a que “teñen unhas instalacións espectaculares, tanto para xogar como para adestrar, un corpo técnico moi bo e porque o obxectivo do playoff, individualmente, virame moi ben”, comentou Álvaro.
A pesar de que asinou ata xuño de 2018, o lateral esquerdo espera, “se o fago ben”, estar no Compos máis tempadas. Por iso, desexa “empezar a traballar aquí, facelo o mellor posible, gozar, xogar e demostrar o xogador que son”.
Para aqueles que non o coñecen, Álvaro definiuse como “un lateral ofensivo que me gusta chegar á área rival e participar no xogo de ataque, pero ao final son defensa e non teño problema en poñerme o mono de traballo atrás”.
Do equipo actual, o ex canteirán deportivista, coñece a Samu e Ube, de xogar con eles, e moitos outros de telos como rivais. Nese grupo, do que lle falaron moi ben, espera “aclimatarse canto antes”. Do mesmo xeito, espera devolverlle ao club e a Yago Iglesias, co que xa se puxo en contacto, a confianza depositada nel.
Por outra banda, o acto serviu tamén para rubricar a continuidade de Kia como patrocinador oficial do Compos, un ano máis. “Estamos encantados de acompañar tempada tras tempada ao equipo como patrocinadores oficiais e, por iso, damos as grazas ao seu presidente, Antonio Quinteiro, por contar con Compostela Concesionario, e a nosa marca Kia, nunha tempada de gran proxección que virá cargada de éxitos”, declarou Aurelio.
O xerente de Compostela Concesionario, e facendo un símil co seu slogan, “The power to surprise”, está convencido de que o Compos ten “esa capacidade de sorpresa, de marabillar co seu xogo, como reflicte a súa extensa traxectoria, á vez que mostra outras características como a ambición, o esforzo, o traballo en equipo ou a competitividade”, as cales comparte, segundo o seu mandatario, coa empresa automobilística.
