- Este luns visitarán aos nenos os xogadores do primeiro equipo: Lucas Díaz e Samu Rodríguez.
Santiago de Compostela, a 25 de Xuño de 2017.
Arrinca o II Campus da SD Compostela. Mañá, luns 26 de xuño, iniciarase, no campo municipal das Cancelas, o segundo campus de verán do equipo branquiazul. Os nenos inscritos gozarán dunha semana na que se divertirán xogando e adestrando, pero tamén realizando outras actividades que axuden a levar dunha forma máis amena a semana.
O horario de adestramentos e xogos será de 10 da mañá a 1 da tarde e de 4 a 7. Ademais, case a metade dos nenos apuntáronse á comida, a cal se realizará en Cervecería Lois, no Centro Comercial As Cancelas.
Todos os días, os nenos terán a visita dun invitado especial, a excepción do primeiro, no que serán dous. O luns virán Lucas, protagonista do Campus, e Samu, xogadores do primeiro equipo; o martes estará o árbitro de Segunda B Alain Kevin García; o mércores, Borja Iglesias, máximo goleador do Celta B e que realizará a pretempada co primeiro equipo; o xoves, a recente fichaxe do club, Álvaro Casas; mentres que para o venres, o invitado aínda está por determinar.
A maiores, citar que haberá sorteos de agasallos e que o último día, os nenos recibirán un diploma que acredita que participaron neste II Campus da SD Compostela.
