-
O Compos, que volverá aos adestramentos o 18 de xullo, estrearase na Escravitude contra o Boiro.
Santiago de Compostela, a 4 de Xullo de 2017.
Yago Iglesias e os seus xogadores xa coñecen o seu primeiro calendario de pretempada. O novo plantel da SD Compostela arrincará a súa posta a punto de cara a un novo ano na Terceira División o vindeiro martes 18 de xullo, mentres que xogará o seu primeiro amigable o sábado desa semana contra o Boiro, na Escravitude.
Dentro de quince días exactos, o novo proxecto do Compos poñerase en marcha. O equipo volverá á faena na tarde do 18, cunha sesión vespertina que servirá de toma de contacto, nas instalacións de San Lázaro II. Será o primeiro adestramento dun mes moi cargado, no que todas as sesións serán de tarde e á mesma hora, as 18:30.
Para esa primeira semana, os branquiazuis xa terán un primeiro amigable de posta a punto. Será no 50 aniversario da SD Escravitude, nun partido que disputarán contra o CD Boiro no Novo Campo do Doce ás 19:30.
Na seguinte semana, e en plenas festas do Apóstolo, a SD Compostela xogará o partido máis especial do ano, o II Memorial Antonio Bermúdez, en recordo do gran locutor e directivo branquiazul. O encontro será o ‘Día de Galicia’ (25 de xullo) ás 20h en San Lázaro. O rival para tan sinalada data será o CD Lugo, equipo da Segunda División.
Tras este encontro, os branquiazuis xogarán o sábado contra a SD Dubra, no campo Juan Baleato ás 19:30, e o domingo, á mesma hora, contra o Deportivo B, no campo da Silveira (Camporrapado).
Para a seguinte fin de semana celebrarase o Triangular de Praíña, no campo de Reis, no que estará presente a escuadra santiaguesa.
Por último, o martes 15 de agosto, o Compos enfrontarase ao Puebla CF no campo da Alta, na 43 edición do Trofeo Conde de Fenosa.
