Santiago de Compostela, a 23 de Novembro de 2017.
Despois de aumentar o número de triunfos a fin de semana pasada, o obxectivo das categorías inferiores da SD Compostela non é outro que gañar. Os conxuntos queren afianzar ou mellorar as súas posicións na táboa na recta final da primeira volta.
O Xuvenil de Nacional, logo da gran vitoria cultivada en Elviña contra o líder, desexa repetir éxito e para iso terá que superar ao CD Conxo no derbi. O encontro xogarase o sábado ás 16.00 horas en As Cancelas.
O Xuvenil B tamén tentará repetir triunfo, aínda que a tarefa será complicada, xa que se enfrontará ao Bertamiráns, nun partido que se celebrará ás 18.00 horas do sábado no Municipal de Bertamiráns.
O Cadete, pola súa banda, xogará o domingo contra o CD Unión. Tras a derrota contra o Aguiño, os branquiazuis queren afianzar a súa posición en media táboa con tres novos puntos. Enfrontaranse ás 11.15 horas en As Cancelas.
En categoría infantil, o A quere reverter a súa mala dinámica e para iso xogará contra o Sálvora CF, o domingo ás 11.30 horas no Anexo Fieiteira; e o B, tras o revés da xornada anterior, busca un triunfo contra o Cire Melide que o manteña nos postos altos da táboa. O partido xogarase o sábado ás 11.15 horas no campo da Barrosa (Villestro).
En alevíns, o primeiro equipo mídese ao CD Conxo, o sábado ás 10.30 horas en Santa Isabel, e o B, segundo clasificado, ao Villestro SD, unha hora máis tarde. Mentres, o Benxamín quere sumar os seus primeiros puntos da liga ante o Amio, o sábado ás 15.30 horas no campo da Barrosa.
