-
Samu conseguiu o tanto da igualada no segundo período.
Santiago de Compostela, a 25 de marzo de 2018.
Novo punto do Compos para seguir no máis alto da clasificación. Os nosos chegan ao parón de Semana Santa con catro de vantaxe sobre o Bergantiños, tras empatar 1-1 no complicado campo da Lomba contra o Arosa SC.
Os locais adiantáronse no marcador no primeiro tempo, pero a base de insistir, o empate acabou chegando cun tiro raso de Samu no segundo período, grazas ao cal os branquiazuis suman catro xornadas sen perder.
A SD Compostela saltou ao campo da Lomba coa mentalidade clara. Sabía que o reto era moi difícil, pero confiaba nas súas posibilidades. Con todo, a tarefa complicouse aínda máis ao cuarto de hora. O Arosa adiantouse no marcador por mediación de Javi Pazos. O pichichi da categoría aproveitou un centro á área de Julio Rei para rematar o balón ao fondo da rede no primeiro pau.
Co paso dos minutos, os nosos foron collendo o mando do partido e comezaron a chegar á meta de Lloves. Así, á media hora, a centro de Tomás, Primo estivo a piques de igualar o marcador. Con todo, o seu cabezazo foise ao pau.
Sete minutos máis tarde, Santi atopou a Lloves no seu disparo desde a frontal e no rexeite, Saro rematou fóra por moi pouco, xa que o balón saíu rozando o pau.
Cando mellor estaban os branquiazuis, o árbitro sinalou o descanso, pero á volta dos vestiarios, a tónica do encontro continuou. Os nosos tiñan a posesión e grazas a ela chegou o tanto do empate.
Xogada longa do Compos que se culminou cun tiro de Samu desde a frontal. Santi tocouna para Róber, o porriñés de punteira para Samu e o mediocentro, tras controlar, soltou un gran disparo raso potente ao que non puido chegar Lloves.
Coa igualada, o Compos seguiu percutindo na área local e, aínda que Sylla rematou arriba un centro desde a esquerda, a máis clara nesta fase tívoa Rubén nunha contra, pero o seu disparo foise por encima do traveseiro.
Cos trocos, o partido perdeu ritmo pero cada equipo aínda puido marcar un gol. Primeiro, Lucas despexou a córner un balón que se envenenou tras rebotar na perna de Yerai e despois Róber desperdiciou dous centros de Rubén. En primeira instancia escapóuselle o control, tras o pase atrás, e na segunda opción, o seu remate coa punteira marchouse pegado ao pau da meta de Lloves.
O marcador non se moveu e cada equipo levou un punto para a súa casa. O Compos conseguiu sumar nun campo moi complicado e ademais aumenta a vantaxe no liderado. Os nosos chegan ao parón de Semana Santa con catro puntos sobre o segundo e xa pensan no difícil partido da próxima xornada contra o Alondras.
FICHA TÉCNICA:
1- Arosa SC: Lloves; Batallón (Javi Matos, m.82), Rivas, Vitra, Marcos; Sidibé, Sergio Santos (Seva, m.65); Yerai (Carlos T., m.86), Julio Rei, Sylla; e Javi Pazos.
1- SD Compostela: Lucas; Saro, Cardeñosa, Álvaro Casas, Naveira; Samu, Tomás (Mon, m.75); Róber, Santi (Diego Rey, m.61), Rubén (Álex Ares, m.82); e Primo.
Goles: 1-0: Javi Pazos; min.17; 1-1: Samu, min.59.
Árbitro: Pérez Prado, colexio vigués. Amoestou a Yerai e Vitra, polos locais, e a Álvaro Casas, Saro e Naveira, polos visitantes.
Incidencias: Partido da trixésimo primeira xornada de Liga da Terceira División disputado no campo da Lomba ante 850 espectadores.
