[cs_video column_size=”1/1″ video_url=”https://youtu.be/HbN2P0oprtQ” video_width=”500″ video_height=”250″][/cs_video]
-
O Compos quere tres puntos que o manteñan con vantaxe no liderado.
Santiago de Compostela, ao 13 de abril de 2018.
A SD Compostela viaxará este domingo ao San Lázaro de Noia cun obxectivo claro, certificar o playoff. Para iso, os branquiazuis terán que superar ao equipo local nun encontro que, a pesar das diferenzas na clasificación, presúmese moi igualado.
O Noia CF é un conxunto que xa lle puxo as cousas moi complicadas aos nosos tanto en Copa Deputación, na que superou aos santiagueses por 1-0, como no partido da primeira volta, nun partido que acabou con vitoria do Compos por 3-2.
Por iso, Yago Iglesias, que este domingo verá o encontro desde a bancada tras a expulsión ante o Alondras, e o seu corpo técnico saben que teñen que saltar ao campo cos cinco sentidos postos. “Temos que ser o equipo que xogaba fóra antes de contra o Areas, xa que nas últimas tres saídas empezamos perdendo, cando antes non nos facían gol. A nosa proposta baséase no rigor defensivo e despois do que vimos este ano contra o Noia sabemos que temos que entrar con máxima concentración e que non nos marquen”, analizou o técnico en rolda de prensa.
O adestrador branquiazul explicou que o conxunto noiense, trala chegada de Pose, cambiou o seu estilo de xogo, sendo agora “un equipo máis forte en defensa e que realizou unhas fichaxes con experiencia na categoría que se completou ao que xa tiñan, con xogadores como Dani Conde, Pajarillo, Jon, Hugo ou Ferreiro”.
Estes futbolistas, sumado a que serán un equipo que xoga sen presión, faralles xogar dunha maneira máis solta, comentou Yago, xa que por nome e clasificación somos favoritos. É por isto que o técnico marca unha tripla esixencia nos partidos que quedan ata o final: “Superar a uns rivais que sairán ao 200 % por enfrontarse ao líder, os cales se están xogando á súa vez cousas importantes e, por último, a responsabilidade de defender a primeira posición”.
Por todo iso, “o equipo poñerá toda a carne no asador por quedar primeiro”, dixo Yago, e este domingo non será menos. Así, o obxectivo esta semana é confirmar matematicamente o playoff. “Sería o primeiro éxito da tempada a falta de cinco xornadas”, engadiu.
Co reto claro de sumar os tres puntos e confiando no seu corpo técnico, do que di que son todos un, o equipo sairá a por todas en Noia. Desexan seguir mantendo a vantaxe e, coa axuda do público que se desprace, buscarán superar este primeiro reto.
CONVOCATORIA
Lucas, Lorenzo; Saro, Cardeñosa, David Uña, Álvaro Casas, Naveira; Mon, Samu, Tomás, Alberto, Álex Ares, Róber; Sobrido, Santi e Primo.
