Santiago de Compostela, ao 19 de abril de 2018.
Os equipos das categorías inferiores da SD Compostela encaran a recta final dos seus respectivos campionatos con partidos que se antollan cada vez máis decisivos e nos que esperan sacar os mellores resultados posibles.
En primeiro lugar, o xuvenil de Liga Nacional tentará reaccionar para evitar o descenso aínda que para iso teña que gañar ao segundo clasificado, o Ural, un equipo case ascendido e que pelexa polo liderado contra o Celta. O encontro xogarase o sábado ás 16.00 horas en Cancelas.
Pola súa banda, o xuvenil B quere manterse na súa posición cómoda na táboa, polo que tentará superar ao Atlético Fátima, o sábado ás 17.00 horas no campo da Devesiña, en Recesende.
O cadete, como é habitual, xogará o domingo de mañá, 10.00 horas, en Santa Isabel contra o Conxo, tentando emular o resultado conseguido fai quince días.
En infantís, o A enfrontarase contra o Escola Estrada no Municipal Manuel Regueiro, o sábado ás 12.15 horas, na xornada 32 de liga.
En categoría alevín, o A tentará manterse na parte do playoff, gañándolle ao La Salle en Santa Isabel, o sábado ás 10.00 horas, mentres que o B medirase á SD Cacheiras, o domingo ás 12.45 horas no campo da Cañoteira.
Por último, o Benxamín buscará sumar a súa segunda vitoria consecutiva, esta vez contra o Val do Ulla, o sábado ás 16.30 horas en Santa Isabel. Pola súa banda, o biberón medirase ao Bertamiráns no municipal de Belvís, o domingo ás 10.30 horas.
