[cs_video column_size=”1/1″ video_url=”https://www.youtube.com/watch?v=iswVv02T_Ls&t=498s” video_width=”500″ video_height=”250″][/cs_video]
-
A SD Compostela buscará o punto que lle queda para asegurar o primeiro posto
Santiago de Compostela, a 5 de Maio de 2018.
O obxectivo da SD Compostela para esta recta final de liga está a un só punto. Tras asegurarse o playoff, xornadas atrás, o equipo busca agora certificar matematicamente o primeiro posto e para iso deberá sumar un punto nos dous partidos que quedan de liga. A primeira pedra de toque para cantar o bingo será o CD Arenteiro, o domingo ás 18.00 horas no campo Municipal do Espiñedo.
A pesar da diferenza na clasificación, o Compos medirase a un equipo cunha tendencia á alza nas últimas xornadas, que pelexa por escapar das posicións que puidesen carrexar un posible arrastre. Nun campo que estará a rebentar, os branquiazuis queren facer valer a súa meta e poder celebrar o ansiado título do grupo 1 da Terceira División.
Con todo, Yago Iglesias explicou que o equipo ten claro que o partido non será nada sinxelo e por esta razón vai saír como nos últimos. “Imos expor o encontro igual que se fose unha xornada anterior, xa que queremos puntuar, se pode ser de tres mellor, pero faremos un partido serio, contra un equipo que quere materializar a permanencia”, argumentou en rolda de prensa.
Ademais, o técnico ten claro que O Espiñedo non é o mellor campo para as condicións de xogo dos branquiazuis, polo que lles tocará cambiar de rexistro. “Debemos ser un equipo solvente, agresivo, que teña claro o que ten que facer e iso pasa por ser serios, non conceder e aproveitar as ocasións que teñamos”, analizou.
Outro factor para ter en conta polos branquiazuis será a enorme afección, “moi sa”, que enche o campo cada quince días, algo que os santiagueses esperan contrarrestar cunha gran afluencia de xente desde a capital de Galicia. “Espero que veña moita xente, como noutros partidos de visitantes, como o de Negreira, Boiro ou Arosa, e que poidan celebrar ese momento que se viviu moi pouquiño o martes”, comentou.
Ese logro sería o premio ao traballo ben feito durante todo este tempo, no que o equipo estivo moi por encima do que se poderían imaxinar. “Levamos moitísimas xornadas de primeiros e iso é moi difícil, hai que gozar do camiño sen pensar máis aló. Somos o segundo plantel máis novo, de xente de aquí, para xente de aquí, que está a bater récords, tendo un rendemento brutal e cun aceno de identidade do corpo técnico, polo que se somos campións vai ser a repera”, sentenciou o técnico ribeirense.
O corpo técnico ten claro ademais que pechar este reto canto antes permitiralles preparar o “super premio” con máis tempo e iso é un punto moi a favor. “Teriamos quince días para preparar o que vén despois, co que iso leva de adestramento físico, quitar minutos a xente que está moi cargada, probar cousas, botar unha ollada ao resto de grupos buscando información e ese é o obxectivo para mañá, deixar pechada unha etapa para comezar a pensar na seguinte”, sinalou Yago.
Coas ideas ben claras e tras unha semana na que o equipo gozou moito, “algo que notamos no feeling coa afección e o ambiente nos adestramentos”, os nosos queren rematar a faena. Desexan que O Carballiño se tinga de branquiazul para celebrar o que sería o quinto título de Terceira División para o club. Só falta un paso e o Compos quere dalo mañá.
