Santiago de Compostela, ao 21 de maio de 2017.
Nunha xornada na que a maioría dos equipos das categorías inferiores xogaron os seus partidos de Copa, a nota positiva deixouna o xuvenil de Liga Nacional, quen no penúltimo partido de liga sacou un valiosísimo triunfo contra o CD Boiro que lle permite seguir con vida para a última xornada.
Precisamente, os xuvenís gañaron por 3-2 ao conxunto do Barbanza, nun duelo no que remontaron o tanto inicial dos visitantes. Marcos González, por dúas veces, e Marcos Andrade puxeron un claro 3-1 a favor dos nosos, resultado que foi recortado na parte final, pero que permitiu sumar tres importantes puntos aos santiagueses.
Agora mesmo, os mozos dirixidos por Juan José Quintáns están a dous puntos tanto do propio Boiro como do Arousa, a falta dunha xornada, e quítanlle catro ao Coruxo, polo que xa se libraron do descenso directo. Con todo, por arrastres, os santiagueses aínda poderían caer.
Polo de súpeto, a próximo fin de semana tentarán gañar ao Ourense CF e despois esperar os resultados dos demais para saber se salvan a categoría ou non.
Pola súa banda, o xuvenil B, na primeira rolda da Copa do Sar caeu por 4-2 na súa visita ao Bertamiráns. Os nosos igualaron no marcador no 78 cun tanto de Marcos Andrade, pero recibiron outros dous nos últimos instantes.
En infantís, o A caeu eliminado na segunda rolda da Copa do Sar contra o Lalín. Os branquiazuis empataron o partido a dous goles, pero acabaron perdendo na lotería dos penaltis. Mellor sorte tivo o Infantil B que gañou por 0-5 ao Amio SD, na ida dos cuartos de final da Copa de Santiago.
Por último, o benxamín perdeu por 1-0 contra o Milladoiro, nun partido no que os nenos de Uña non tiveron fortuna, mentres que o biberón caeu contra o Oroso no último encontro da súa liga.
