-
O mediocentro analizou o partido de onte en rolda de prensa
Santiago de Compostela, ao 21 de maio de 2018.
Tras un adestramento de recuperación, un día despois do duro encontro de ida contra o RCD Espanyol B, Samuel Rodríguez analizouno en rolda de prensa. O de Bembibre cre que onte lles faltou algo de sorte cara a portería rival.
“Vendo como acabou o partido queda a sensación de que lle puidemos meter, polo menos, un gol”, sentenciou, malia que matizou que “o obxectivo era levar aberta a eliminatoria para a volta e iso cumpriuse e en liñas xerais creo que nos saíu un bo encontro”.
Analizando a semana, Samu comentou que cando esperaban o sorteo ninguén quería o Espanyol, pero que unha vez lles tocou “mentalízaste de que tes que pelexar como sexa e durante a semana traballamos para facerlles dano e creo que se notou durante o partido”.
Os xogadores branquiazuis sabían que terían que correr detrás da pelota, pero ao final cando máis padeceron foi nos primeiros minutos, aínda que “empezaron con moito ritmo, pero con pouca profundidade e co paso dos minutos fomos aclimatándonos mellor”.
Segundo o mediocentro, o que palpa o equipo é que puideron facerlles máis dano, pero son cautos xa que saben “que eles comezaron mellor”. Con todo, o plantel considera que co paso dos minutos foron dando a volta á tortilla, en especial, grazas ao apoio da bancada. “Cando che aplauden en cada ocasión ou apertan en xogadas dubidosas, como no posible penalti a Primo, iso nótase moito e axúdache”, argumentou Samu.
Para o partido de volta, o medio cre que será un duelo “que en liñas xerais será semellante ao de aquí, coa diferenza de que eles terán á súa afección e pódelles dar algo máis de motivación e ritmo ao comezar o encontro”.
Pese a todo, as condicións dun campo “espectacular, de grandes dimensións, parecido a San Lázaro, non lles fará cambiar moito de rexistro”, apuntou. Con ganas de gozar, o equipo confía en si mesmo, máis cando pensan que cun gol, eles teñen que meter dous.
“Este ano demos un paso adiante nos partidos de visitantes, víusenos máis tranquilos e afrontámolos moi ben, aínda que neste caso, as condicións do campo serán similares e non como na liga”, analizou.
No que respecta á viaxe, o equipo irá ás 22.00 horas do sábado, circunstancia que non incomoda en demasía ao mediocentro xa que “sempre é máis ameno que ir en autobús”. Ademais, sinala que o club buscou a opción máis viable e que tampouco hai que darlle máis voltas.
Por último, Samu fixo un chamamento para que a xente que poida “viaxe si ou si, porque canta máis axuda teñamos vai ser moito mellor, notarase moitísimo”.
